Մասնագետը նախազգուշացրել է արևածաղկի սերմերի գործածության հնարավոր վտանգի մասին

Բովված արևածաղկի սերմերը բավական տարածված ու սիրված մթերք են, սակայն դրանք կարող են խիստ վտանգավոր լինել առողջության համար։ Այս մասին «Звезда» հեռուստաալիքի հետ զրույցում ասել է բժիշկ-ներզատաբան Տատյանա Բոչարովան։

Մասնագետի խոսքով՝ բովված վիճակում արևածաղկի սերմերը դառնում են քաղցկեղածին տարրերի աղբյուր, ուստի առողջական խնդիրներից խուսափելու համար դրանք հարկավոր է օգտագործել հում վիճակում։ Բացի այդ, այս մթերքն ունի նաև չափազանց բարձր կալորիականություն, ուստի քաշի ավելացումից խուսափելու համար այն հարկավոր է օգտագործել խիստ սահմանափակ։

«100 գրամում պարունակվում է 550 կալորիա, ինչը հավասար է շոկոլադի սալիկի կալորիականությանը։ Խնդիրն այն է, որ դրանք չեն դիտարկվում որպես լիարժեք ուտեստ ու նպաստում են քաշի ավելացմանը», – բացատրել է Բոչարովան։

Մասնագետը հերքել է տարածված պնդումն այն մասին, որ արևածաղկի սերմերի գործածությունը կարող է հանգեցնել կույր աղիքի որդանման ելունի բորբոքման, սակայն նախազգուշացրել է, որ ստամոքսի խոցային հիվանդության ու գաստրիտի դեպքում այս մթերքի կանոնավոր գործածությունը կարող է հանգեցնել հիվանդությունների սրման։

Միևնույն ժամանակ մասնագետը հիշեցրել է, որ արևածաղկի սերմերը հարուստ են մեծ քանակությամբ մանրաթելերով, А, Е և B խմբի վիտամիններով, ինչպես նաև սրտամկանի ու նյարդային համակարգի աշխատանքի համար շատ կարևոր մագնեզիումով, ուստի դրանից լիովին հրաժարվել պետք չէ։ Առողջական խնդիրներից խուսափելու համար այս մթերքը խորհուրդ է տրվում օգտագործել բացառապես հում վիճակում և շատ քիչ քանակությամբ։