Գագիկ Ջհանգիրյանի ունեցվածքը 501 հազար 500 դրամ է. նա շարժական ու անշարժ գույք չի հայտարարագրել

ArmDaily.am-ը «Հայտարարագիր» շարքում այս անգամ կներկայացնի ԲԴԽ անդամ, ԲԴԽ նախագահի պարտականությունները կատարող Գագիկ Ջհանգիրյանի ունեցվածքը: 

Ով է Գագիկ Ջհանգիրյանը

Ծնվել է 1955թ. ապրիլի 16-ին Արարատում:

1977թ. ավարտել է Երեւանի պետական համալսարանի իրավաբանական ֆակուլտետը: Իրավագետ: Իրավաբանական գիտությունների թեկնածու:

1970-1973թթ. «Բարձրշինտրեստ» 6-րդ շինվարչությունում աշխատել է գիշերապահ: 1977-1990թթ. եղել է ՀԽՍՀ ԳԱ փիլիսոփայության եւ իրավունքի ինստիտուտի լաբորանտ, կրտսեր գիտաշխատող, ավագ գիտաշխատող: 1990-1997թթ.` ՀՀ արդարադատության նախարարության դատական մարմինների վարչության պետ, նախարարի առաջին տեղակալ: 1997-2006թթ. եղել է ՀՀ զինվորական դատախազ, ՀՀ գլխավոր դատախազի տեղակալ, 2006-2008թթ.` ՀՀ գլխավոր դատախազի տեղակալ:

2012թ. մայիսի 6-ին ԱԺ պատգամավոր է ընտրվել համամասնական ընտրակարգով «Հայ ազգային կոնգրես» կուսակցությունների դաշինքից: 06.05.2012-13.04.2013թթ.՝ անկուսակցական: 13.04.2013թ.՝ «Հայ ազգային կոնգրես» կուսակցության վարչության անդամ:

2021թ-ի հուվնարի 22-ից՝ ԲԴԽ անդամ: 

Ամուսնացած է, ունի երեք զավակ:

Ունեցվածքը

Գագիկ Ջհանգիրյանը հայտարարագիր ներկայացրել է 2021թ-ի փետրվարի 18-ին: Նա  հայտարարագրել է 1500 դրամ բանկային հաշվի մնացորդ և 500 000դրամ կանխիկ գումար: Ջհանգիրյանը տուն, հողամաս կամ ավտոմեքենա չի հայտարարագրել: 

2017թ-ի՝ ԱԺ պատգամավորի պաշտոնը թողնելու հայտարարագրում ևս միայն դրամական միջոցներ է հայատարարագրել վերջինս: 5.000.000 դրամ և աշխատանքի դիմաց ստացած 2,203,990 դրամ: 

Ջհանգիրյանի կինը ոչ 2016թ-ին ներկայացրած հայտարարագրում, ոչ էլ 2021թ-ին ներկայացրած հայտարարագրում ոչինչ չի հայտարարագրել: 

Նշենք սակայն, որ Ջհանգիրյանի ունեցվածքի ու մասնավորապես նրա առանձնատան մասին մամուլում բազմաթիվ հրապարակումներ եղել են և Ջհանգիրյանը ևս հաստատել է, որ այդ առանձնատունն իրեն է պատկանում: 

Մանսավորապես Ազգային ժողովում ԲԴԽ անդամի ընտրության ժամանակ Ջհանգիրյանին հարց ուղղվեց, թե իր դղյակը, բիզնեսներն ինչպես է ձեռք բերել: 

«Անդրանիկ Քոչարյանն ինձ դիտողություն էր արել, թե մամուլի հետ հաղորդակցվելիս ինչու բնակարանի հարցին անդրադարձա էդքան երկար, մանրամասն: Ասաց՝ պետք է ասեիր, որ Բաղրամյան փողոցի հարևանությամբ եռահարկ տունը, որը կառուցվել էր 1989-1990թթ., երբ պաշտոնյա չեք եղել, վաճառել եք, այդտեղ կառուցել եք: Հիմա կարող եմ այդ հարցին այդպես պատասխանել», – ասաց Գագիկ Ջհանգիրյանը՝ հավելելով, որ իր բնակարանները վաճառել է, հին սեփական տունը քանդել է, և նրա տեղում կառուցել իր տունը: Իսկ իր տունը «դղյակ» որակելն այսպես մեկնաբանեց. «Դղյակային որևէ բան չկա, հարևանությամբ այնպիսի դղյակներ կան, որ մեր տունը գոմի է նման, և այն հողը, որը քաղաքապետարանն ինձ էր հատկացրել, եղել է աղբանոց»: