Սերժ Սարգսյանը համբերատար սպասում է
ՎԵՐԼՈՒԾՈՒԹՅՈՒՆՆԵՐ
Կարծես թե գրեթե բոլոր քաղաքական ուժերը համակերպվել են այն փաստի հետ, որ տեղի են ունենալու արտահերթ ընտրություններ և այդ ընտրությունները կազմակերպելու է Նիկոլ Փաշինյանը։ Թերևս բացառություն է Հանրապետական կուսակցությունը։ Սերժ Սարգսյանը դեռ չի շտապում։ Նախ, Նիկոլի կողմից ընտրություններ կազմակերպելը և առհասարակ նրա գոյությունը վարչապետի աթոռին ինքնին նոնսենս է, հակաքաղաքական, հակաքաղաքագիտական և հակաբարոյական իրողություն։ Ողջ աշխարհը զարմացած է, թե ո՞նց կարող է երկրի ղեկավարը այսկերպ կազմաքանդի 2 հայկական պետություն, պատերազմում հազարավոր զոհեր ու տարածքային կորուստներ ունենա, բայց ոչ միայն շարունակի պաշտոնավարել, այլև հավակնություններ ունենա հաղթել ընտրություններում։ Ինչևէ, ունենք այն, ինչ ունենք։
Քաղաքական դաշտն, ըստ էության, անհամբեր սպասում է ՀՀԿ ընտրությունների մասնակցության հարցի հստակեցմանը և որ ամենակարևորն է՝ ձևաչափին։ Խնդիրն այն է, որ արտախորհրդարանական ամենամեծ, ամենաինստիտուցիոնալացված և բյուրեղացած ուժը Հանրապետականն է, որի մասնակցությունը կփոխի իրերի դասավորվածությունը։ Հանրապետականները նշում են, որ ընդդիմադիր մյուս ուժերը «դեռ ջուրը չտեսած բոբիկացել են»։ Ըստ էության, դեռ պաշտոնապես չկա ընտրությունների մասին որևէ գործընթաց, բայց բոլորը աժիոտաժի մեջ են։ Իսկ եթե Նիկոլը երկրորդ անգամ փոշմանի։
Տպավորություն է, որ ընտրություններին մասնակցության հայտ ներկայացրած ուժերի մեծ մասի նպատակը ոչ թե Նիկոլին հեռացնելն է, այլ մի քանի մանդատ ձեռք գցելը։ Տպավորություն է, որ մի մասի նպատակն էլ ՀՀԿ-ի քաղաքական կապիտալն օգտագործելով խորհրդարան ներթափանցելն է մինիմում մակարդակում, և իշխանության հասնելը մաքսիմում մակարդակում։ Սերժ Սարգսյանը շատ լավ հասկանում է սա։ Նա դեռ չի շտապում, միևնույն ժամանակ հասկանում է, որ Հանրապետականի քաղաքական ողջ ներուժը չի կարող չօգտագործվել Նիկոլ Փաշինյանին իշխանությունից հեռացնելու գործում։ Սերժ Սարգսյանը, լինելով պրագմատիկ քաղաքական գործիչ, շատ լավ հասկանում է, որ նախընտրական փուլում ցանկացած արհեստական գործընթաց միմիայն նպաստելու է Նիկոլի իշխանության վերարտադրությանը, հետևաբար նա և իր քաղաքական թիմը ամենայն զգուշությամբ են առաջ տանում պրոցեսները։
Ակնհայտ է, որ ՀՀԿ-ն մի քանի մանդատի կռիվ չի անում։ Նույնիսկ 2018թ.-ին Հանրապետականը շուրջ 5 տոկոս հավաքեց, հիմա ավելի շատ կհավաքի, բայց արդյո՞ք դա կհեռացնի Նիկոլին։ Սա է հարցը և վերջնական նպատակը։
Կարեն Դանիելյան
