Արգավանդի խաչմերուկում կային հողեր, որոնք վաճառվել էին հինգ-վեց դրամով, մինչդեռ ... Իշխան Զաքարյան

ԱԺ հերթական քառօրյա նիստում շարունակվում էր ՎՊ 2015թ. տարեկան հաշվետվության քննարկումը, որի ժամանակ ԱԺ «Ժառանգություն» խմբակցության պատգամավոր Թեւան Պողոսյանը հարց ուղղեց այն մասին, թե այդ ինչպես է ստացվում, որ ՎՊ զեկույցի ծավալները տարեցտարի նվազում են. 2013-ին զեկույցի ծավալը 61 էջ էր, 2014-ին՝ 34 էջ, իսկ 2015-ին՝ 25 էջ:
Պատգամավորը նաեւ հետաքրքրվեց, թե ՎՊ նախագահը կարո՞ղ է վստահաբար ասել, որ այն ոլորտներում, որտեղ ստուգումներ ու խախտումներ են հայտնաբերվել, հետագայում վիճակի բարելավում ու զարգացում է գրանցվել: Հարցին ի պատասխան՝ Իշխան Զաքարյանը նշեց. «ՎՊ զեկույցի համար թիվ մեկ չափանիշը ընթացիկ հաշվետվությունն է, որը բարեխղճորեն դրվում է ՎՊ կայքում: Հաջորդ տարվա հաշվետվությունն էլ ավելի կնվազի, ընթացիկ հաշվետվությունները միջանկյալ հաշվետվությունների հետ անցնում են 2000 էջը, սակայն այդքանը չեն կարող տեղ գտնել ՎՊ զեկույցում, որովհետեւ ՎՊ-ն շարժվում է Ինտոսայի սկզբունքով»,- ասաց ՎՊ նախագահը՝ հավելելով, թե այլ բան է, երբ ստուգումների ադրյունքում վերացնում են խախտումները, այլ բան է, որ ՎՊ-ն որոշ դեպքերում առաջարկում է խախտումները վերացնել օրենսդրական փոփոխությունների ու կառավարության որոշումներում փոփոխությունների միջոցով:
«Ես նշել էի, որ Արգավանդի խաչմերուկում կային հողեր, որոնք վաճառվել էին հինգ-վեց դրամով, մինչդեռ ուղղակի շուկայական գները 800-1000 ԱՄՆ դոլարի սահմանում էին: Հիմա, որ նայում ենք, գրեթե չկա դեպք, որ վաճառքը կադաստրային գներից ցածր լինի, որովհետեւ մենք առաջարկեցինք օրենսդրական փոփոխություն, կառավարության որոշումներում փոփոխություններ կատարվեցին: Շինարարության ոլորտում ծավալային հավելագրումների մասով խախտումները վերացել են: Այս ամենը չի նշանակում, որ այդ ոլորտներում ամեն ինչ հարթ է»,- ասաց Իշխան Զաքարյանը: