Նիկոլ Փաշինյանը ինձ վաղը հրավիրել է քննարկումների, ես ընդունել եմ հրավերը. Էդմոն Մարուքյան
ՔԱՂԱՔԱԿԱՆՈՒԹՅՈՒՆ
Առավոտյան ինձ հետ կապ է հաստատել Նիկոլ Փաշինյանը և առաջարկել հանդիպում-քննարկում ունենալ իր հետ արտահերթ ընտրությունների վերաբերյալ: Այս մասին լրագրողների հետ զրույցում ասել է ԱԺ «Լուսավոր Հայաստան» խմբակցության ղեկավար Էդմոն Մարուքյանը:
«Ես համաձայնությունս տվել եմ, երբ հանդիպենք ու քննարկենք բոլոր առաջարկները, հանդիպումից հետո կհայտնեմ՝ ինչ ենք քննարկել և ինչ եզրահանգման ենք եկել»,- ասաց Էդմոն Մարուքյանը:
Էդմոն Մարուքյանը նշեց, որ իր առաջարկը վարչապետի թեկնածու չառաջադրվելու վերաբերյալ ուժի մեջ է: «Ես պատրաստ եմ ստորագրել հուշագիր և իմ երեկվա հայտարարությունից հետո որևէ բան չի փոխվել, ես իմ խոսքի տերն եմ, ես իմ առաջարկի տերն եմ, որին արձագանք չի եղել»,- ասաց նա:
Էդմոն Մարուքյանն ասաց՝ հանդիպման ընթացքում Նիկոլ Փաշինյանից պահանջելու է փաստեր երեկվա հայտարարության հետ կապված, որ Օնիկ Գասպարյանը կատարել է ՀՀ 3-րդ նախագահ Սերժ Սարգսյանի հրամանը:
«Վարչապետը հայտարարել է, որ Օնիկ Գասպարյանը Սերժ Սարգսյանի հրամանն է կատարել այս փաստաթուղթը ստորագրելով, և ես՝ որպես ՀՀ քաղաքացի և խորհրդարանական խմբակցության ղեկավար, ապացույցներ եմ պահանջելու վարչապետից, այդ ապացույցների հրապարակում»,- տեղեկացրեց նա:
Էդմոն Մարուքյանը հավաստմամբ՝ երեկ հրապարակում Նիկոլ Փաշինյանը արել է հայտարարություն, որը չի համապատասխանում իրականությանը:
«Մեր երկրի ղեկավարը ժողովրդին հավաքում է հրապարակում և ուղիղ եթերում մի քանի միլիոն հայություն նայում է մի բան, որը իրականության չի համապատասխանում, այսինքն պետք է Օնիկ Գասպարյանի հեղինակությունը գցել և ասել՝ Սերժ Սարգսյանի հրամանն է ստորագրել, ես հիմա ընդամենը այդ հրամանի մասին ապացույց եմ ուզում»,- ասաց նա:
