Եթե Ադրբեջանի հետ ստորագրված երրորդ փաստաթուղթը ՀՀ վարչապետն է ստորագրել, ապա պետք է ասել, որ նա այդպիսի իրավազորությամբ օժտված չէ. Րաֆֆի Ասլանյան

Եթե Ադրբեջանի հետ ստորագրված երրորդ փաստաթուղթը ՀՀ վարչապետն է ստորագրել, ապա պետք է ասել, որ նա այդպիսի փաստաստաթուղթ ստորագրելու իրավազորությամբ օժտված չէ ՀՀ ներպետական օրենսդրությամբ։ Հետևաբար, նա գործել է իրեն չընձեռված լիազորությունների սահմաններում։ Այս մասին ArmDaily.am-ի հետ զրույցում ասաց փաստաբան Րաֆֆի Ասլանյանը։

«Սահմանադրության 6-րդ հոդվածում ամրագրված է օրինականության սկզբունքը, 6-րդ հոդվածի առաջին մասի համաձայն պետական և տեղական ինքնակառավարման մարմինները, ինչպես նաև պաշտոնատար անձինք իրավասու են կատարել գործողություններ, որոնց համար լիազորված են Սահմանադրությամբ կամ օրենքներով։ ՀՀ վարչապետը, եթե ենթադրաբար ինքն է ստորագրել այդ փաստաթուղթը, այդպիսի փաստաթուղթ ստորագրելու իրավազորությամբ օժտված չէ»։

Նա ընդգծեց, որ ՀՀ Քրեական օրենսգրքի 300.1 հոդվածը հստակ ամրագրում է Սահմանադրական կարգի տապալումը, Սահմանադրության 1-ից 5-րդ հոդվածներում և 6-րդ հոդվածի 1-ին մաում ամրագրված նորմը փաստացի վերացնելը, այն է՝ իրավական համակարգում դրա գործողությունը դադարեցնելը։ «Սա նշանակում է, որ այսպիսի գործողության արդյունքում փաստացի վերացվել է օրինականությունն ամրագրող ՀՀ Սահմանադրության 6-րդ հոդվածի առաջին մասը, ինչը նշանակում է, որ, այո, առերևույթ արարքում պետք է փաստել Սահմանադրական կարգի տապալման հանցակազմը։ Սա առերևույթ։ Բայց քննություն կատարելու և հանցակազմի առկայության վերաբերյալ վերջնական եզրահանգումներ անելու համար կան իրավասու մարմիններ, որոնք պարտավոր են զբաղվել դրանով»։

Նա նաև ընդգծեց, որ ՀՀ Քրեական դատավարության օրենսգրքում ամրագրված են վարույթ նախաձեռնելու առիթները։ «Դրանք կարող են լինել հաղորդումների ձևով, ինչպես իրավաբանական անձանց կողմից, այնպես էլ ֆիզիկական անձանց կողմից։ Դրանք կարող են լինել քննիչի կողմից իր լիազորությունն իրականացնելիս ձեռք բերված տվյալները նաև հետաքննիչի, դատախազի, դատավորի կողմից, ինչպես նաև կարող են լինել ԶԼՄ-ներում առկա տեղեկությունները։ Այս ամենը վարույթ նախաձեռնելու առիթ են, հետևաբար, քրեական հետապնդման մարմինները, իհարկե, իրավունք ունեն փաստի առթիվ նախաձեռնել վարույթ և իրականացնել քննություն»։