Այս քաղաքականությունը պետությանը դեֆոլտի է տանում
ՎԵՐԼՈՒԾՈՒԹՅՈՒՆՆԵՐ
Պատերազմից հետո կառավարությունն առաջին հերթին պետք է գույքագրեր պատերազմի հետևանքով առավել շատ վնաս կրած տնտեսության ճյուղերը և հասցեական աջակցություն ցուցաբերելու միջոցառումների ցանկ մշակեր, հետո նաև իրականացներ: Սակայն 3 ամիս է անցել, բայց նման բան տեղի չի ունենում: Բազմաթիվ տնտեսագետներ ահազանգում են ստեղծված մտահոգիչ վիճակի մասին: Առավել խնդրահարույց է 750 միլիոն դոլարի պարտատոմսեր՝ եվրոբոնդեր թողարկելու կառավարության որոշումը: Իշխող խմբակցության պատգամավոր Բաբկեն Թունյանն ասում է՝ եթե պարտք չվերցնենք՝ թոշակներն ու աշխատավարձերն ինչպե՞ս ենք վճարելու: Այսինքն կառավարությունը պարտք է ներգրավվում, որ ընթացիկ ծախսեր սպասարկի:
Հիմա լսենք մասնագետներին. Օրինակ, տնտեսագետ, «Աուդիտորների պալատի» նախագահ Նաիրի Սարգսյանը, շատ վտանգավոր քայլ է համարում պարտքեր վերցնելը և ընթացիկ ծախսեր սպասարկելը: Ըստ նրա՝ այս քաղաքականությունը պետությանը դեֆոլտի է տանում, այս քաղաքականության հետևանքով տնտեսությունը կարող է պայթել: Անդրադառնալով 750 միլիոն դոլարի պարտատոմսեր՝ եվրոբոնդեր թողարկելու որոշմանը՝ Նաիրի Սարգսյանը նշում է.
«Պետությունը եկամուտների բացակայության պայմաններում ծախսերը սպասարկելու երկու ուղղություն ունի՝ պետական գույքի վաճառք կամ պարտքի ներգրավում: Ըստ էության, գույքի տեսանկյունից արդեն ամեն ինչ վաճառված է, իսկ եթե գույք կա, հարց է, թե այդքան արագ գնորդ կգտնվի՞, թե՞ ոչ: Մյուս տարբերակը մնում է պարտքի ներգրավումը: Եթե պարտքը ներգրավում ենք ընթացիկ ծախսերը սպասարկելու համար, ապա սա ռիսկային է, որովհետև այդ պարտքի վերադարձելիությունը կասկածի տակ է: Չմոռանանք նաև այն, որ նախորդ կառավարությունների թողարկած եվրոբոնդերի մարման ժամկետները մոտենում են: Այսինքն, ստացվում է, որ նույնիսկ դա չենք կարողանալու սպասարկել, բայց ևս մեկ անգամ պարտքն ավելացնում ենք»:
Արձանագրենք՝ պարտք է ներգրավվում ընթացիկ ծախսերը սպասարկելու համար: Դա նշանակում է՝ տնտեսական կոլապսի եզրին ենք: Բայց եթե անկեղծ, ապա Նիկոլ Փաշինյանի կառավարությանը կարծում եմ դա քիչ հետաքրքիր է, եթե նույնիսկ հետաքրքիր է, ապա չկան մասնագետներ խնդիրը լուծելու համար: Հաջորդ կառավարությանը չես նախանձի հաստատ, որը անգամ մեծ ցանկության դեպքում շատ լուրջ դժվարություններ կունենան այս անդունդից տնտեսությունը փրկելու համար:
Կարեն Դանիելյան
