Հոլանդիայում 100 մարդու մոտ հայտնաբերել են կողմնակի ազդեցություններ կորոնավիրուսի դեմ Pfizer պատվաստանյութով պատվաստումից հետո
ՀԱՍԱՐԱԿՈՒԹՅՈՒՆ
rbk.ru-ն գրում է, որ Հոլանդիայում մոտ 100 մարդու մոտ հայտնաբերել են կողմնակի ազդեցություններ կորոնավիրուսի դեմ Pfizer և BioNTech պատվաստանյութերով պատվաստումից հետո: Այդ մասին NOS հեռուստաընկերությանը հայտնել է Ֆարմակոհսկողության կենտրոնը: Ըստ կենտրոնի դեղորայքի ընդունումից հետո երկու դեպքում արձանագրվել է ծանր ալերգիկ ռեակցիա:
«Դա վերաբերում է այնպիսի ախտանիշներին, ինչպիսիք են ցանը և աչքերի շուրջ այտուցը»,- ասել է կենտրոնի ղեկավար Ագնես Կանտը:
Կողմնակի ազդեցություններով տառապող յուրաքանչյուր անձ ստացել է բժշկական օգնություն և արագ վերականգնվել է: Կանտը հավելել է, որ մնացած դեպքերը վերաբերում են պատվաստանյութերին բնորոշ կողմնակի բարդություններին: Դրանք ներառում են ցավը ներարկման տեղում, գլխացավը և հոգնածությունը: Այդ կողմնակի ազդեցությունները սովորական էին Pfizer պատվաստանյութ ստացողների շրջանում:
Հոլանդիան կորոնավիրուսի դեմ Pfizer-ով սկսել են պատվաստումներ իրականացնել դեկտեմբերի 27-ից: Կանտը նշել է, որ հունվարի 14-ին երկրում պատվաստվել է շուրջ 47 000 մարդ:
«Մենք ակնկալում էինք, որ յուրաքանչյուր 10 հազար պատվաստումների դեպքում կլինեն կողմնակի ազդեցությունների 20-25 դեպքեր, ուստի ներկայիս ցուցանիշը համապատասխանում է մեր գնահատականներին»,- ասել է կենտրոնի ղեկավարը:
Միևնույն ժամանակ, նա նշել է, որ ոչ բոլոր պատվաստված մարդիկ կարող են ունենալ կողմնակի բարդություններ: Նորվեգիայում Pfizer պատվաստանյութ ստանալուց հետո առնվազն 23 մարդ է մահացել, այդ մասին հաղորդել է Նորվեգիայի դեղերի գործակալությունը: Բոլոր մահացածների տարիքը եղել է 80-ից բարձր և նրանք ունեցել են քրոնիկ հիվանդություններ, ասել է գործակալության խոսնակ Ստեյնար Մադսենը: Գործակալության գլխավոր բժիշկ Սիգուրդ Հորթեմուի խոսքով, ստացված հաշվետվությունները ցույց են տալիս, որ պատվաստանյութի ընդհանուր կողմնակի ազդեցությունները, ինչպիսիք են տենդը և սրտխառնոցը, կարող են հանգեցնել որոշ տարեց հիվանդների մահվան, որոնք ունեցել են առողջական խնդիրներ:
Նյութը հրապարակման պատրաստեց Կամո Խաչիկյանը
