Եկել է սգից դուրս գալու, սթափվելու, ապրելու, նոր ընտանիքներ կազմելու, երեխաներ ունենալու, ազգովի համախմբվելու, կառուցելու, ամրանալու ու, վերջապես, հաղթելու ժամանակը․ Արթուր Ղազինյան
ՔԱՂԱՔԱԿԱՆՈՒԹՅՈՒՆ
Եկել է սգից դուրս գալու, սթափվելու, ապրելու, նոր ընտանիքներ կազմելու, երեխաներ ունենալու, ազգովի համախմբվելու, կառուցելու, ամրանալու ու, վերջապես, հաղթելու ժամանակը: Այս մասին ֆեյսբուքյան իր էջում գրել է «Մեկ Հայաստան» կուսակցության նախագահ Արթուր Ղազինյանը
Նա, մասնավորապես, գրել է․
«Սիրելի հայրենակիցներ,
Սուրբ Ծնունդը նշանանավորում և խորհրդանշում է վերածնունդ և նորի սկիզբ, ինչը մեզ ստիպում է վերաիմաստավորել անցյալը, գտնել և խոստովանել մեր գործած սխալները, մտածել ու գործուն քայլեր կատարել այդ սխալնելն ուղղելու և դրանք այլևս չկրկնելու ուղղությամբ:
Անցած տարին ցավ, կորուստ, վիշտ ու ողբերգություն բերեց մեր ազգին, ցավն աննկարագրելի է, կորուստը՝ անվերականգնելի: Հազարավոր քաջարի մեր որդիները, եղբայրներն ու հայրերը իրենց կյանքը դրեցին հայրենիքի պաշտպանության զոհասեղանին, բայց անառիկ ամրոցի դռները թշնամու առջև բացվեցին ներսից:
Սուգը պատել է ամբողջ ազգին՝ Հայաստանում, թե դրանից դուրս, ցավում ենք բոլորս, վշտից մոլորվել ենք, կորցրել ապագայի ուղենիշերը, ապրելու ու պայքարելու իմաստն ու նշանակությունը:
Բայց հայ ազգի պատմության մեջ սա առաջին դավաճանությունը չէ, առաջին պարտությունն ու ողբերգությունը չէ, մեր առաջին սխալը չէ, որ հանգեցրել է այսպիսի ողբերգական հետևանքների, սակայն այդ նույն պատմությունը մեզ ապացուցել է, որ բոլոր պարտություններից հետո բացվում է հաղթանակների նոր հնարավորություններ, որոնց կյանքի կոչումը կախված է բացառապես մեզնից. որքան շուտ մենք կսթափվենք, կլցվենք ապրելու ու ապրեցնելու կենսական էներգիայով, կհամախմբվենք ապագա հաղթանակների շուրջ, կկառուցենք ու կշենացնենք մեր հայրենիքը, այնքան շուտ կկարողանանք վերածնվել որպես ազգ ու անշեղորեն ընթանալ դեպի նոր հաղթանակներ:
Թուլանալու, հուսահատվելու, թևաթափ լինելու ժամանակ կամ իրավունք չունենք, պետք է արագ վերգտնենք մեր ապրելու և ապրեցնելու ուժը:
Եկել է սգից դուրս գալու, սթափվելու, ապրելու, նոր ընտանիքներ կազմելու, երեխաներ ունենալու, ազգովի համախմբվելու, կառուցելու, ամրանալու ու, վերջապես, հաղթելու ժամանակը:
Սա են մեզնից ակնկալում Եռաբլուրում ննջող մեր տղերքը, նրանք պահանջում են նոր կյանք, վրեժ ու հաղթանակ: Միայն կատարելով իրենց ցանկությունը մենք կիմաստավորենք ու կարժևորենք մեր հերոսների իմացյալ մահն ու անմահությունը, բաց ճակատով և ուղղված ողնաշարով կներկայանանք նրանց շիրիմներին ու մեր ապագա սերունդներին:
Աստված օգնական մեր ազգին ու պետությանը»:
