Խմբագրական խորհրդակցությամբ ղեկավարվող Հայաստան
ՎԵՐԼՈՒԾՈՒԹՅՈՒՆՆԵՐ
Օրվա տեղեկատվական լրահոսը փոփոխվում է կայծակնային արագությամբ․ անընդհատ լուրեր են շրջանառվում՝ տարածքներ հանձնելու, նորից զոհեր տալու և մեր դիրքապահներին գերեվարելու մասին ինֆորմացիաները պայթեցնում է մարդու բանակակնությունը: Ու այս ամենը կատարվում է Նիկոլի պատասխանատվությանը վստահված երկրում: Սույն անձնավորությանը ժողովուրդը քվե է տվել` համոզված լինելով, որ ապահովելու է անվտանգությունը և՛ ներսում, և՛ սահմաների վրա՝ որպես երկրի վարչապետ, իսկ պատերազմի ժամանակ` գերագույն գլխավոր հրամանատար: Արդյո՞ք գիտակցում էր Փաշինյանը, որ նման պատասխանատվություն էր ստաձնելու, երբ այլընտրանք չթողնելով՝ հայտարարում էր․ «կա՛մ ես կընտրվեմ վարչապետ, կա՛մ Հայաստանը վարչապետ չի ունենա»: Փաստացի Արցախում իր խնդիրը հիմնականում լուծելուց հետո Ադրբեջանն անցել է Հայաստանի սահմանների վերաձևմանը: Օրը ցերեկով բացահայտ զիջումներ ենք ունենում Սյունիքի բարձրադիր, տասնամյակներով ամրացրած և մեզ համար շահեկան դիրքերում, զիջում ենք Կապանի անվտանգության գոտին: Վտանգված է Կապանի օդանավակայանը, Գորիս-Կապան մայրուղին, Սյունիքի համայնքները մնում են թշնամու նշանառության տակ, որ ամեն վայրկյան կրակի տակ է լինելու բնակիչների ապրելու իրավունքը: Թշնամին ուզում է, իսկ մենք տալիս ենք, և սա արվում է ՀՀ իշխանությունների ու թշնամու ձեռք բերված համաձայնությամբ: Այսօր իշխանությունները, մասնավորապես ՊՆ-ն, մեր դիրքապահներին հրամայում են թողնել դիրքերը թշնամուն և նահանջել:
Պատնեշները զիջելով` Ադրբեջանին տալիս ենք սահմաններն է՛լ ավելի առաջացնելու դյուրին հնարավորությունը վաղվա և մյուս օրերի համար, ինչը բնավ էլ բացառված չէ նման անտերուդուրս պայմաններում: Երկրի վարչապետի աթոռը զբաղեցնող անհատը և իր կառավարությունը բացարձակ անկարող են ապահովել ՀՀ անվտանգությունը, և օր-օրի տանուլ ենք տալիս մեր հանրապետությունը, այսօր՝ Սյունիքից, վաղը լինելու է Տավուշից կամ ասենք Գեղարքունիքից: Այս ամենին զուգահեռ շոշափելիորեն չենք զգում մեր բանակի ներկայությունը և համապատասխան նախարարության գոյությունը: Մեր իշխանությունը չկարողացավ միջազգային հանրության ուշադրությունը դարձնել այն փաստին, որ զինադադարից հետո ադրբեջանցիները հարձակվում են հայկական դիրքերի վրա, սպանում եւ գերեվարում են դիրքապահներին, կարծես դա նորմալ է և բնական:
Օր-օրի իրականությանը մոտ է դառնում այն ենթադրությունը, որ այս պատերազմը պայմանավորված էր: Տեսանելի է, որ պայմանավորվածություն կա նաև պատերազմից հետ հարևան երկրին Հայաստանից տարածքներ հանձնելու շուրջ: Այս իշխանությունն ամեն վայրկյան սպառնում է Հայաստանի անվտանգությանը` ուղղակի զիջելով տարածքներ: Նման իրավիճակում ԱԱԾ-ն, որ երկրի անվտանգության երաշխավորն է, պարտավոր է կանխել չարիքը` մեկուսացնելով Նիկոլ Փաշինյան երևույթին, որը կանգ չի առնում երկիրը թշնամուն հանձնելու գործընթացում ո՛չ պատերազմական իրավիճակում, ո՛չ խաղաղ ժամանակ: ԱԱԾ-ն պարտավոր է այսօր գործել հանուն վաղվա Հայաստանի, քանի որ ապագան վտանգված է ու անորոշ: Եվ դա պետք է անի հենց այսօր, վաղը ուշ կլինի, վաղը մենք նոր տարածքներ կզիջենք Ադրբեջանին:
Անդրանիկ Կիրակոսյան
