Շուշիի շրջանի 3 գյուղերը Ադրբեջանին փոխանցելու կամ զիջելու մասին խոսք չկա. նախարար
ՀԱՍԱՐԱԿՈՒԹՅՈՒՆ
Արցախի տարածքային կառավարման և զարգացման նախարար Ժիրայր Միրզոյանը Sputnik Արմենիայի հետ զրույցում ներկայացրել է Շուշիի գյուղերում տիրող իրավիճակը։
Ռուս խաղաղապահների միջամտությունից հետո ադրբեջանցիները քիչ առաջ հետ են քաշվել Շուշիի շրջանի Հին Շեն ու Մեծ Շեն գյուղերի մոտից։ Տեղեկությունը Sputnik Արմենիային հայտնեց Արցախի տարածքային կառավարման և զարգացման նախարար Ժիրայր Միրզոյանը։
«Երկու ժամ առաջ են հետ քաշվել։ Մենք պատրաստ ենք եղել բնակիչներին դուրս հանել գյուղերից, բայց քանի որ ադրբեջանցիներն արդեն հետ են քաշվել, դրա կարիքը չկա։ Գյուղերի միջև ճանապարհը բաց է», – ասաց Միրզոյանը։
Նշենք, որ շուրջ մեկ օր ադրբեջանցի զինծառայողները փակել էին Հին Շենից Մեծ Շեն տանող ճանապարհը։ Նրանց վախից բնակիչները փորձել էին լքել գյուղերը։
Sputnik Արմենիայի հարցին, թե Շուշիի շրջանի` հայկական վերահսկողության տակ մնացած գյուղերի տարածքում կա՞ն արդյոք հայ զինծառայողներ, Միրզոյանը ասաց, որ բանակ որպես այդպիսին տեղում չկա։
«Զինվորներ կան, բայց համատարած կանգնած չեն, առաջնագիծ չկա, խրամատներ չկան», – ասաց նախարարը։
Նա շեշտեց, որ Շուշիի շրջանի բոլոր գյուղերը` բացառությամբ պատերազմի ժամանակ գրավված Շուշիի ամենախոշոր գյուղ Քարինտակի, մտնում են Լաչինի 5 կմ–անոց միջանցքի մեջ և ըստ այդմ պետք է մնան հայկական կողմի վերահսկողության տակ։ Խոսքը Հին Շեն, Մեծ Շեն, Եղցահող, Լիսագոր և Քիրսավան գյուղերի մասին է։
«Հիմա ստացվում է` այդ գյուղերը շրջափակման մեջ են, սակայն դրանք Ադրբեջանին փոխանցելու կամ զիջելու մասին խոսք չկա։ Չնայած Խծաբերդի մասին էլ նման բան չկար, բայց նրանք հարձակվեցին ու գրավեցին գյուղը», – ասաց Միրզոյանը։
Հիշեցնենք, որ դեկտեմբերի 11-ին՝ ժամը 20:40-ի սահմանում, օգտվելով այն փաստից, որ Արցախի Հանրապետության տվյալ հատվածում խաղաղապահ ուժեր տեղակայված չեն, Ադրբեջանի զինված ուժերի հատուկջոկատային ստորաբաժանումները գրոհ են ձեռնարկել արցախա-ադրբեջանական շփման գծի՝ Հադրութի շրջանի Հին Թաղեր և Խծաբերդ բնակավայրերի հատվածում, ինչի հետևանքով տարբեր աստիճանների հրազենային վիրավորումներ են ստացել ՊԲ վեց զինծառայողներ, իսկ ադրբեջանական կողմը գրավել էր Հին Թաղեր գյուղը ու մասամբ մտել նաև Խծաբերդ։
ՀՀ արտգործնախարարությունը հայտնել էր, որ ադրբեջանական ուժերը սադրիչ գործողությունները շարունակել են նաև Մեծ Շեն և Հին Շեն բնակավայրերի ուղղությամբ։
Նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
