Գեներալն իր «ափսեում» չէր

Օրերս հայտնի դարձավ, որ ադրբեջանական ուժերն իրենց դիրքերն են ամրապնդում Սոթքի ոսկու հանքի հատվածում, որտեղ նրանք ներթափանցել էին նոյեմբերի 26-ին՝ կոտրելով ՀՀ և Արցախի սահմանին կառուցված եռագույնով ներկած դարպասը։ Նոյեմբերի 26-ի գիշերը Հայաստանի Ազգային հերոս, Հայաստանի ԶՈՒ ԳՇ պետի առաջին տեղակալ Տիրան Խաչատրյանը լրագրողների հետ արտակարգ հանդիպմամբ պարզաբանումներ ներկայացրեց Սոթքում տիրող արտակարգ իրավիճակի վերաբերյալ:

Ըստ էության՝ այս պարագայում սակայն, արժե անդրադառնալ թերևս մեկ այլ հարցի, որը ընդհանուր վիճակում կարող է մանրուք թվալ, սակայն ահազանգող մանրուք: Ակնառու էր, որ ԶՈՒ ԳՇ պետի առաջին տեղակալ, գեներալ Խաչատրյանը լրագրողների հետ հանդիպմանն «իր ափսեում» չէր, ինչը միանգամայն հասկանալի է ու բնական: Գեներալի գործն արտակարգ իրավիճակում մամուլի ճեպազրույցը չէ, և ընդհանրապես գեներալի գործը մամուլի հետ շփումը չէ: Առավել ևս, ընդամենն օրեր առաջ տեղի ունեցած դաժան պատերազմում մարտական սխրանքի համար Ազգային հերոսի կոչման արժանացած գեներալի գործը:

Այստեղ հարց է առաջանում, մի՞թե ՀՀ-ում այդ օրը չէր գտնվել պարզաբանումների պատրաստ, կամ դրա համար պատրաստված մի խոսնակ, որ այդ առաքելությունը հանձնարարվել էր Զինված ուժերի ԳՇ պետի առաջին տեղակալին: Առավել ևս, որ այն, ինչ ասում էր գեներալը, կարելի էր շատ արագ սովորեցնել միջին մի չինովնիկի, որը կներկայացներ իրավիճակն ու պատկերը և Ազգային հերոսը տասնյակ տեսախցիկների առաջ չէր հայտնվի ոչ «իր ափսեում»: Փաստացի թերևս մանրուք թվացող դրվագի հատկանշականությունը, որն արտացոլում է ներկայումս ՀՀ պետական կառավարման համակարգի թե՛ կազմակերպական, թե՛ արժեբարոյական սեյսմանկայունությունը:

Անդրանիկ Կիրակոսյան

www.1or.am