ՀՀ ներքաղաքական թեժացում․ ի՞նչ սպասել առաջիկայում
ՎԵՐԼՈՒԾՈՒԹՅՈՒՆՆԵՐ
Հետևելով վերջին զարգացումներին՝ ակնհայտ է դառնում, որ նոյեմբերի 9-ից հետո Հայաստանում ներքաղաքական թեժ իրավիճակ է, իշխանության հրաժարականի պահանջով: Այդ ընթացքում մոտենում է ժամանակը, երբ պետք է իրականացվի եռակողմ փաստաթղթով նախատեսված գործողությունների ժամանակացույցը, մասնավորապես տարածքների հանձնման հետ կապված: Նոյեմբերի 15-ին նախատեսված է Քարվաճառից հայկական ուժերի դուրսբերումը, ներկայումս բնակիչները դուրս են բերում իրենց իրերը, տեղափոխում հուշարձանները և այլն: Այս ընթացքում Երևանում հանրահավաքներ են իշխանության հրաժարականի պահանջով, իրավիճակից ելքի գործնականում զրո կոնկրետ առաջարկով, ընդհանուր պնդումներով, հրաժարականի կոչերով:
Իշխանությունը դրան արձագանքում է ձերբակալություններով, «նախկին-ներկա» կամ «սև-սպիտակ» տեխնոլոգիայի կիրառումով, դավաճանության և դասալքության մասին մեղադրանքներով: Հայաստանի համար դա առկա մարտահրավերները լուծելու միջո՞ց է, թե ոչ: Իսկ մարտահրավերները հստակ են՝ առնվազն առաջիկա օրերի համար գտնել տարածքների հանձնումը կանխելու հնարավորություն, հետո ավելացնել նպատակները՝ մինչև Շուշիի և Հադրութի վերադարձ նվազագույնը: Սրան զուգահեռ օրերս Սերգեյ Լավրովը հեռախոսազրույց է ունեցել Զոհրաբ Մնացականյանի հետ, քննարկվել են համաձայնագրի իրականացման հարցեր: Համաձայնագրով սահմանված քայլերը հայկական կողմի ստանձնած պարտավորությունն են, հայտարարել է Կրեմլի խոսնակ Պեսկովը դրանց իրականացման հետ կապված հարցին ի պատասխան: Կրեմլը մինչ այդ իրականացնում է ռազմական մուտքը Արցախ զինտեխնիկայով, սպառազինությամբ, ընդհուպ մարտական ուղղաթիռներով: Կրեմլի խոսնակը ակնարկում է, որ համաձայնագրի մյուս դրույթներն այնքա՞ն էլ իր պարտավորությունը չեն: Համենայն դեպս, ուշադրության է արժանի փաստը, որ պարզ չէ, թե ինչ է լինում, երբ շեղվում է ժամանակացույցը:
Հարց է առաջանում, թե կարո՞ղ է արդյոք Հայաստանում ներքաղաքական թեժ պայքարը դառնալ հայկական կողմի համար իրադարձությունների անցանկալի ժամանակացույցը առժամանակ արգելակելու լեգիտիմ հնարավորություն, եթե այդ իրադրությունը հասունանա ընդհուպ արտահերթ ընտրական գործընթացի աստիճանի:
Անդրանիկ Կիրակոսյան
