Հայաստան տեղափոխված հայ զինվորականների դիերն անդամահատված են եղել. ՔԿ
ՀԱՍԱՐԱԿՈՒԹՅՈՒՆՔրեագիտության վարչության պետը, որը մասնակցել է նաև 2016թ–ի ապրիլյան պատերազմի ընթացքում իրականացված հանցագործությունների քննությանը, Sputnik Արմենիայի հետ հարցազրույցում նշում է, որ ագրեսորների ձեռագիրն այս անգամ շատ ավելի դաժան է։
Հայկական կողմին փոխանցված հայ զինծառայողների 29 մարմինների մեջ եղել են անդամահատված դիեր։ Այս մասին Sputnik Արմենիայի հետ հարցազրույցում ասաց ՀՀ Քննչական կոմիտեի Քրեագիտության վարչության պետ Ռաֆայել Վարդանյանը։
«Մենք ունենք միայն նախնական զննության տվյալներ և նշանակել ենք դատաբժշկական փորձաքննություն։ Դիակի արտաքին զննությամբ կան անդամահատված դիեր»,– ասաց նա։
Թե իրականում ինչն է եղել խեղման պատճառը, և արդյոք անդամահատումները դիակապտության կամ խոշտանգման հետևանք են, քննչական մարմնի ներկայացուցիչը խոստանում է պաշտոնապես հայտարարել միայն դատաբժշկական փորձաքննության եզրակացությունը ստանալուց հետո։
Վարդանյանը նաև հայտնեց, որ ներկա պահին Հայաստան բերված 29 զինծառայողների դիակներից միայն 4-ին են հարազատները ճանաչել։ Այս գործընթացը ևս դեռ շարունակվում է։
Քրեագիտության վարչության պետը, որը մասնակցել է նաև 2016թ–ի ապրիլյան պատերազմի ընթացքում իրականացված հանցագործությունների քննությանը, նշեց, որ ագրեսորների ձեռագիրն այս անգամ շատ ավելի դաժան է։
«Դաժանության, խոշտանգումների քանակն է ավելի շատ, առանձնակի դաժանությամբ կատարված, միջազգային մարդասիրական իրավունքի նորմերի կոպտագույն խախտման դեպքերը շատ ավելի շատ են»,– ասաց Վարդանյանը։
Նրա խոսքով՝ Քննչական կոմիտեում Ադրբեջանի ու Թուրքիայի ռազմաքաղաքական ղեկավարության կողմից ռազմական ագրեսիայի ակտի վերաբերյալ 38 քրեական գործ է հարուցվել, որոնք արդեն միավորվել են մեկ վարույթում։ Քրեական գործը, սակայն, պարբերաբար լրացվում է միջազգային իրավունքի նորմերի ու անմարդկային արարքների նորանոր փաստերով։
Հիշեցնենք` հոկտեմբերի 29-ին հայկական կողմին էին փոխանցվել ռազմական գործողությունների ընթացքում զոհված 29 հայ զինծառայողների մարմինները, Հայաստանին էր արտահանձնվել նաև մեկ քաղաքացիական անձ՝ տարեց կին: Կարմիր խաչի միջազգային կոմիտեն հայտնել էր, որ քաղաքացիական երկրորդ անձի` 84–ամյա Միշա Մելքումյանի ճամփորդությունն այդ պահի դրությամբ բժշկական առումով հակացուցված էր։ Հաջորդ օրը հայտնի դարձավ, որ Մելքումյանը մահացել է։
