Անորոշ կարգավիճակի դիմաց տարածքներ հանձնելու ձևաչափն այլևս չի կարող աշխատել. Անդրանիկ Քոչարյան
ՎԵՐԼՈՒԾՈՒԹՅՈՒՆՆԵՐ
Երեկ մամուլում տեղեկություններ էին հրապարակվել, թե Ադրբեջանի ղեկավարը հայտարարել է, որ առանց նախապայմանների պատրաստ է բանակցելու Հայաստանի հետ: Նրա հայտարարության զավեշտալի կողմը, սակայն այն էր, որ հայտարարությունն ամբողջությամբ այնպիսի նախապայմաններ էին պարունակում, որոնց մասին տարիներ շարունակ նա երազում է: ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն անդրադառնալով դրան ասաց, որ Ալիևի երեկ հնչեցրած բոլոր առաջարկները մշտապես էլ եղել են, բայց նման ելույթից առաջ հակառակորդը նախ պետք է հասկանա, թե ինչ է անվտանգության գոտի հասկացությունը, ինչպես է այն ձևավորվում և որն է դրա նպատակը:
«Արցախի շուրջ ձևավորված անվտանգության գոտու շնորհիվ է Արցախում տարիներ շարունակ անվտանգություն ապահովել: Եվ այսօր խոսել անվտանգության գոտին հանձնելու մասին՝ անիմաստ է: Այնպես որ, միջազգային կառույցները, ինչպես նաև Մինսկի խմբի անդամ երկրները անվտանգության գոտու մասին խոսելիս պետք է հասկական, որ դրանով հայ ազգն իր գոյության խնդիրն է լուծում: Եվ այն ձևաչափը, որը տարիներ շարունակ քննարկվել է Մինսկի խմբի կողմից, առաջարկելով անորոշ կարգավիճակի դիմաց տարածքներ հանձնել, այլևս չի կարող աշխատել, քանի որ հակառակորդն այս պատերազմով ցույց տվեց, որ տարածքներն իրենց պետք են առանց հայերի: Այսօր էլ նրանք փորձում են ոչնչացնել խաղաղ բնակիչներին: Ուստի, հին տրամաբանությամբ մոտենալ այս խնդրին չի կարելի: Եվ, եթե շարունակենք խոսել նույն հարցերի մասին, դա նշանակում է վերադարձ 90-ականներին և հակառակորդին ավելի լայն հնարավորություն տալ, որ ոչնչացնի մեր ազգաբնակչությանը: Այս պայմաններում մեր թիվ մեկ պահանջը դարձել է Ացախի ճանաչումը: Դա միակ քայլն է, որը առաջնահերթ կերպով կլուծի Արցախի ժողովրդի անվտանգության խնդիրը»,- ասաց Ա. Քոչարյանը:
Աստղիկ Նահապետյան
