Հայոց հզոր սփյուռքի շնորհիվ նյութական օգնությունից բացի շատ այլ հարցեր են լուծվում
ՔԱՂԱՔԱԿԱՆՈՒԹՅՈՒՆ
Հայոց սուրբ հողը պաշտպանող հայ զինվորի կողքին է նաև ողջ աշխարհասփյուռ հայությունը: Սփյուռքի մեր հայրենակիցների ջանքերով օր օրի բազմապատկվում են հայրենիք ուղարկվող դրամական և հումանիտար օգնությունները, ինչը խոսում է ոչ միայն հայ ազգի միասնականության, այլև նոր զարթոնքի մասին: Այլևս ոչ մի հայի մտքով չի անցնում անտարբեր մնալ ու չխառնվել իր հայրենիքում տեղի ունեցող իրադարձություններին: Ժամանակն է շնորհակալություն հայտնել սփյուրքի մեր հայրենակիցներին, որը մեկ մարդու նման ոտքի կանգնեց և ոտքի կանգնեցրեց իրենց երկրի պետական ու դիվանագիտական կառույցներին: Հենց այս միասնականության ուժն է, որ առաջ է մղում մեր զինվորին արդեն 11 օր ու գիշեր կյանքի ու մահու կռիվ տալ սահմանին և պայքարել թուրք-ահաբեկչական խմբավորման դեմ և անառիկ պահել հայոց հողն ու մեր հայրենիքը:
Սփյուռքի միասնական ջանքերի շնորհիվ Եվրոխորհրդարանում սկսվեցին նաև քննարկումներ, որոնք ցույց տվեցին, թե տարբեր երկրների պատգամավորներն ինչքան տեղեկացված են ու զայրացած Թուրքիայի ու Ադրբեջանի դեմ: Այդ ամենից բացի, նրանք չվարանեցին ամենախիստ պատժամիջոցների դիմելու կոչեր ու առաջարկություններ հնչեցնել: Սա ևս խոսում է սփյուռքի համախմբված աշխատանքի մասին, որի արդյունքում աշխարհին ուղղված մեսիջները ոչ միայն բարեհաջող տեղ են հասնում, այլև արդյունավետ են հայերի դեմ ուղղված թուրք-ադրբեջանական նենգ քայլերի մասին իրազեկելու ու ճշմարտությունը աշխարհին ներկայացնելու համար: Սփյուռքի մեր հայրենակիցների ջանքերի շնորհիվ այս հարցը միջազգայնացվեց, հնչեղություն ստացավ ու միջազգային հանրությանը ստիպեց գործուն քայլեր ձեռնարկել:
Ուստի փառք նաև մեր հզոր սփյուռքին, որը թիկունք կանգնելով հայրենիքին ևս մեկ անգամ կարողացավ աշխարհին ցույց տալ, որ պետք չէ մեզ հետ խոսել պարտադրանքի լեզվով: Բացի այդ, ժամանակն է օր առաջ վերջ դնել կրավորական կեցվածքին և հստակ քայլեր ձեռնարկել ահաբեկչական երկրների ձեռքը բռնելու և նրանց քաղաքակիրթ աշխարհից մեկուսացնելու համար:
Արմինե Գրիգորյան
