Ասում են հսկիչ գին, բայց հսկիչ գնով չեն մաքսազերծում. ներկրող
ՀԱՍԱՐԱԿՈՒԹՅՈՒՆ
Հայաստան հագուստ ներկրող Վարդան Բաբայանը, որը ընդամենը մի քանի օր առաջ է իր բեռը մաքսազերծել, տեղեկություն էր տարածել, որ բեռը, որը մաքսազերծել է կազմել է 33 կիլոգրամ, որի մաքսազերծման համար վճարել է 102 հազար դրամ, գումարած 15 հազար դրամ բրոքերի ծառայության համար։
1or.am-ը գործարարից փորձեց ճշտել, թե արդյոք Վ. Բաբայանը գոհ է մաքսազերծման նոր պայմաններից: Մեզ հետ զրույցում, սակայն, նա նշեց, որ նոր պայմանները միայն վնասելու են, քանի որ ներկրողներն այսուհետ Չինաստանից ապրանքը կներկրեն ոչ թե Հայաստան, այլ Ռուսաստան, այնտեղ կմաքսազերծեն և կտեղափոխեն Հայաստան:
«Ռուսաստանում, Բելառուսում մաքսազեծման դրույքաչափերը չեն փոխվել, մնացել են հին դրույքաչափերը: 1 կլիոգրամի արժեքը 3 դոլար է մնացել: Նախկինում Չինաստանից Ռուսաստանով չէինք բերում ապրանքը, քանի որ մոտ 20 տոկոս թանկ էր մաքսազերծումը: Հիմա հակառակն է դարձել՝ Հայաստանում է 50 տոկոսով թանկացել: Մենք էլ ապրանքը ավելի կարճ ժամանակում կբերենք Ռուսաստան, այնտեղ մաքսազերծենք, նոր կբերենք Հայաստան»,- ասաց Վ. Բաբայանը:
Հարցին, թե այդ դեպքում ճանապարհածախսը եթե գումարվի մասքազերծման արժեքին, արդյո՞ք նույն պատկերը չի ստացվի, գործարարը հավաստիացրեց, որ մաքսազերծման և տեղափոխման ծախսերը միասին ավելի քիչ կկազմի, քան Հայաստանում մաքսազերծելու դեպքում է: Ինչ վերաբերում է Թուրքիայից ապրանք ներկրելու ժամանակ մաքսազերծման արժեքի կրկնակի թանկացմանը, ապա այստեղ ևս գործարարի համար անհասկանալի երևույթներ կան, որոնց պատասխանը նրան էլ էր հետաքրքրում:
«Որտեղի՞ց են վերցնում հսկիչ գները հասկանալի չէ: Բոլորին առաջարկում ենք ոչ թե մոլերում և թանկանոց տոնավաճառներում իրենց ուսումնասիրությունները կատարեն, այլ ամենաէժան տոնավաճառների գներին ծանոթանան: Ի դեպ, վերջին բեռը, որը մաքսազերծել եմ Թուրքիայից էի ներկրել, մոտ երկու օր առաջ հսկիչ գներով մաքսազերծեցին: Ասում են հսկիչ գին, բայց հսկիչ գնով չեն մաքսազերծում: Կիլոգրամով մաքսազերծեցին, գումարած 20 տոկոս ավելացված արժեքի հարկը: Փաստաթղթում գրված է 54 հատ շոր, որը կազմում էր 24 կիլոգրամ, մաքսազերծել են 2,2 եվրոյով, դրան գումարել են 20 տոկոս ԱԱՀ: Մեկ այլ խնդիր էլ կա, որ առանց բրոքերի թույլ չեն տալիս մաքսազերծում իրականացնել: 15 հազար դրամ էլ հավելյալ վճարել եմ բրոքերին, ինչը աբսուրդ է, մինչդեռ նախկինում 300 կգ-ից ավելի բեռի դեպքում էինք բրոքերի միջոցով մաքսազերծում»,- ասաց Վ. Բաբայանը:
Անժելա Կիրակոսյան
