Հասուն, սթափ, խաղաղասեր. 10 փաստ ԱՄՆ-ի նախագահի Դեմոկրատական կուսակցության թեկնածու Ջո Բայդենի մասին
ՀԱՍԱՐԱԿՈՒԹՅՈՒՆ
Ռուսական РБК ամսագրի լրագրող Եվգենի Պուդովկինը իր «Зрелый, трезвый, миролюбивый:10 фактов о кандидате в президенты США от Демократической партии Джо Байдене» հոդվածում հավաքել է 10 փաստ ԱՄՆ-ի գործող նախագահ Դոնալդ Թրամփի գլխավոր մրցակից և Դեմոկրատական կուսակցության անդամ Ջոզեֆ Բայդենի մասին:
Սա Բայդենի՝ նախագահ դառնալու առաջին փորձը չէ
Ջո Բայդենը նախագահ դառնալու նպատակ է դրել դեռևս 21 տարեկանում, իսկ առաջին անգամ իր երազանքը փորձել է իրականացնել 46 տարեկանում՝ իր թեկնածությունն առաջադրելով Դեմոկրատական կուսակցության առաջնային ընտրություններում: Այն ժամանակ նա ձախողվել և գրագողության մեղադրանքների ֆոնին՝ հանվել է մրցավազքից, քանի որ օգտագործել էր 1987 թվականին բրիտանական լեյբորիստական կուսակցության ղեկավար Նիլ Կիննոկի ելույթի հատվածները:
1973-2009 թվականներին Բայդենը զբաղեցրել է Դելավեր նահանգի սենատորի պաշտոնը: 2008 թվականին քաղաքական գործիչը երկրորդ անգամ առաջադրել է իր թեկնածությունը, բայց առաջին փրայմերիզներից հետո անմիջապես այն հանել է՝ գիտակցելով, որ չի կարող մրցակցել գլխավոր հավակնորդներին՝ Հիլարի Կլինտոնին և Բարակ Օբամային: 2008 թվականին Օբաման Բայդենին հրավիրել է առաջադրվել փոխնախագահի պաշտոնում և դառնալ իր գործընկերը: Այսպիսով, 2009-2017 թվականներին Բայդենը պաշտոնավարել է որպես ԱՄՆ-ի փոխնախագահ: Հայտնի է, որ նա ցանկացել է մասնակցել 2016 թվականի ընտրություններին, բայց Օբամայի խորհրդին հետևելով՝ հրաժարվել է այդ մտքից:
Ընտրվելու դեպքում Բայդենը կդառնա ԱՄՆ-ի ամենատարեց նախագահը
Ընտրվելու դեպքում Բայդենը կդառնա ԱՄՆ-ի ամենատարեց նախագահը. 2021 թվականի հունվարին՝ երդմնակալության օրը, նա կլինի 78 տարեկան (ծնվել է 1942 թվականի նոյեմբերի 20-ին): Մինչև հիմա ԱՄՆ-ի ամենատարեց նախագահը եղել է Դոնալդ Թրամփը, ով իր պաշտոնը զբաղեցրել է 70 տարեկան հասակում:
Ալկոհոլ չի օգտագործում
Իր մրցակից Հանրապետական կուսակցության անդամ Դոնալդ Թրամփի նման, Բայդենը բոլորովին չի խմում: Նախագահի թեկնածուն նշել է, որ պատճառն իր ընտանիքի ներսում՝ ալկոհոլային կախվածության հետ կապված, խնդիրներն են:
Օրինակելի ընտանեհայր (семьянин) է
1966 թվականին Բայդենն ամուսնացել է կուրսընկերուհու՝ Նեյլիա Հանթերի հետ: Զույգն ունեցել է 3 երեխա՝ Բոն, Հանթերն ու Նաոմին: 1972 թվականին՝ Դելավերի նահանգի սենատի ընտրություններում 29-ամյա Բայդենի հաղթանակ տանելուց մի քանի շաբաթ անց, կինն ու փոքրիկ Նաոմին ավտովթարից մահացել են: Սկզբում երիտասարդ քաղաքական գործիչն ցանկացել է հրաժարվել սենատորի պաշտոնից, բայց ի վերջո, որոշել է շարոնակել քաղաքական կարիերան: Հայտնի է, որ երեխաներին տեսնելու համար նա ամեն օր Վաշինգտոնից գնացքով գնում էր Ուիլմինգտոն: 1975 թվականին ծանոթացել է ներկայիս կնոջ՝ Ջիլ Թրեյսի Յակոբսի հետ: 2 տարի անց զույգն ամուսնացել է, իսկ 1981 թվականին ծնվել է նրանց դուստրը՝ Էշլին:
Բայդենը մանկուց տառապել է կակազությունից
Իր հուշագրություններում Բայդենը գրել է. «Երբ ես եղբայրներիս, քրոջս և ընկերներիս հետ գտնվում էի տանը կամ ֆուտբոլ էի խաղում, ապա ամեն ինչ կարգին էր, բայց երբ հայտնվում էի նոր իրավիճակում կամ նոր դպրոցում, դասարանի առաջ պետք է կարդայի կամ ուզում էի աղջկա ժամադրել, ես պարզապես չէի կարողանում դա անել»: Ի վերջո, նա հաղթահարել է խոսքի խանգարումը:
Քվեարկել է Պարսից ծոցում պատերազմի դեմ և կողմ՝ Իրաք ներխուժելու համար
Բայդենը 1990-1991 թթ. Պարսից ծոցում դեմ է քվեարկել պատերազմին, որտեղ ԱՄՆ-ին և Բազմազգ ուժերին հաջողվել է կանխել Քուվեյթի բռնակցումը Իրաքի ներխուժումից հետո: Նա սատարել է 2003 թվականին ԱՄՆ-ի ներխուժումը Իրաք, որը ի տարբերություն ԱՄՆ-ի առաջին միջամտության՝ Վաշինգտոնի համար համարվում է ձախողված: Ավելի ուշ Բայդենը որոշումը համարել է սխալ և Ջորջ Բուշ Կրտսերի վարչակազմին մեղադրել է Իրաքում իր գործողություններում ոչ կոմպետենտ լինելու մեջ:
Հակադրվել է Լիբիայի պատերազմին
Երբ 2011 թվականին Բարակ Օբամայի վարչակազմում քննարկվել է Լիբիա ներխուժելու քայլը, Բայդենը կասկած է արտահայտել դրա նպատակահարմարության մասին:
Աջակցել է Ռուսաստանի հետ հարաբերությունների վերականգնմանը
Բայդենը Ռուսաստանի հետ հարաբերությունները վերականգնելու կողմնակից էր: 2010 թվականի ամռանը, երբ ԱՄՆ-ի հետախուզական գործակալությունները Օբամա-Մեդվեդև հանդիպման նախաշեմին բացահայտեցին «քնած» ռուս գործակալների ցանցը, Բայդենն առաջարկել է չձերբակալել նրանց, որպեսզի չվնասեն Ռուսաստանի հետ հարաբերություններին:
Խաղադրույք է կատարում անձնական հարաբերությունների վրա
Նախագահի թեկնածուն հաճախ շփվում է այլ քաղաքական գործիչների և արտասահմանցի գործընկերների հետ, ինչպես նաև մասնավոր զրույցների ժամանակ անկեղծորեն արտահայտում է սեփական մտքերը: Այս մասին իր հուշագրություններում Օբամայի նախկին խորհրդական Բեն Ռոդսը գրել է. «Նա քայլում էր Արևմտյան թևի (Սպիտակ տան) միջանցքներով՝ զրույցի ժամանակ բռնելով նրանց նախաբազուկը»:
Բայդենի հետ աշխատած Պենտագոնի ղեկավար Ռոբերտ Գեյթսը նշել է նրա հումորի զգացման, պարզության ու անկեղծության մասին:
«Անհնար է չսիրել Ջոյին: Միևնույն ժամանակ, վերջին 40 տարիների ընթացքում նա սխալ դիրքորոշում է ունեցել միջազգային հարաբերությունների և ազգային անվտանգության օրակարգի գրեթե յուրաքանչյուր հարցի վերաբերյալ»,- նշել է նա:
Հարստացել է ԱՄՆ-ի փոխնախագահի պաշտոնը թողնելուց հետո
The Washington Post-ի համաձայն՝ եթե 1998-2009 թվականներին Բայդենի և կնոջ տարեկան եկամուտը 300 հազար դոլարից պակաս էր, ապա փոխնախագահի պաշտոնից հեռանալու պահին այն աճել է՝ հասնելով տարեկան մոտ 100 հազար դոլարի:
Օբամայի վարչակազմի հեռանալուց հետո Բայդենին հաջողվել է ֆինանսապես կայունանալ՝ հրապարակային ելույթների և հրատարակությունների հաշվին:
Նյութը հրապարակման պատրաստեց Լիլիթ Ամիրաղյանը:
