Գազպրոմի ազատված աշխատակիցները հրավիրում են կառավարության և աշխատանքի տեսչական մարմնի ուշադրությունը

«Գազպրոմ Արմենիա» ընկերությունում զանգվածային կրճատումներ են սկսվել: Քիչ առաջ խմբագրություն էին զանգահարել «Գազպրոմ Արմենիա» ընկերության մի խումբ աշխատակիցներ, որոնք զանգվածային կրճատումների պատճառով շուտով կկորցնեն իրենց աշխատանքը: Նրանք պնդում էին, որ համակարգում զանգվածային կրճատումները վերաբերում են միայն1000 տեսուչի, որոնք արդեն ստացել են ծանուցումները ու ստորագրել այն:

Այսինքն՝ երկու տեսուչից մեկին կրճատելու են, մյուսի պարտականություններն ավելացնելու պայմանով: Բացի այդ, այդկերպ փորձելու են ազատվել երկար տարիների աշխատանքային փարձ ունեցող աշխատակիցներից, քանի որ նրանք ավելի բարձր աշխատավարձ են ստանում, քան նոր ընդունվողները:

Մեր խմբագրությանն ահազանգած քաղաքացիները նշում էին, որ եթե կրճատումների պատճառը հաստատված նոր սակագինն է, որն ավելի ցածր է, քան այն հայտում, որը ներկայացրել էր «Գազպրոմ Արմենիան», ապա կարող էին ղեկավար անձնակազմի աշխատավարձը վերանայել: Այդ դեպքում հնարավոր կլիներ մոտավորապես այնքան գումար խնայել, որը նախատեսվում է 1000 տեսուչի կրճատման դեպքում խնայել, բայց ընկերությունը, փաստորեն, գնացել է մարդկանց հացից կտրելու ճանապարհով:

«Կառավարությունը, տեսչական մարմինները ձեռքերը լվացել, մի կողմ են քաշվել, ընկերության տնօրինությունն էլ ինչ ուզում՝ անում է: Տեսուչների մաքուր աշխատավարձը մոտ 150 հազար դրամ է, նոր ընդունվողներին, սակայն, աշխատանքի են ընդունում 70 հազար դրամով: Ընկերության ղեկավարները մի քանի հազար դոլար աշխատավարձ են ստանում, պատկերացնո՞ւմ եք: Եվ այդ պայմաններում առանց վարանելու այսքան մարդու միանգամից զրկում են մի կտոր հացի գումար աշխատելու հնարավորությունից:

Մեր կարծիքով «Գազպրոմ Արմենիան» միտումնավոր է այս ճանապարհով գնում, որպեսզի հասարակության մեջ դժգոհության ալիք բարձրանա, բայց մյուս կողմից էլ իշխանություններն իրավունք չունեն մեր խնդիրները չնկատելու տալով ջուր լցնել նրանց ջրազացին: Մենք համոզված ենք, որ Աշխատանքի տեսչական մարմինն այս հարցում պետք է ակտիվություն ցուցաբերի և թույլ չտա որևէ մասնավոր ընկերության նման կամայականություններ իրականացնել»,- նշեց աշխատակիցներից մեկը, ով չցանկացավ իր անունը հրապարակել:

Կարեն Վարդանյան

http://1or.am/