Վարչապետի հայտարարությունը զայրացրել է ուսուցիչներին, գիտնականներին և այլ մասնագետներին

Երբ հարց է բարձրացվում գիտության, կրթության, մշակույթի և այլ ոլորտների աշխատողների աշխատավարձերը բարձրացնելու մասին, պարզվում է՝ բյուջեում գումար չկա, իսկ երբ հերթը հասնում է կառավարության անդամներին, ապա թե՛ գումար կա, թե՛ հնարավորություն: ՀՀ վարչապետ Նիկոլ Փաշինյանի մոտեցումը, թե կառավարության անդամ նախարարներն ու մարզպետները պետք է ստանան արժանապատիվ վարձատրություն, զայրացրել է շատերին: Հասարակության համար ընդունելի չէ վարչապետի այն արտահայտությունը, որ. «Հայաստանի ժողովուրդը պետք է ուրախանա, որ Հայաստանում գործում են նախարարներ, որոնք այդ պարգևավճարի կարիքն ունեն, որոնք թալանով չեն զբաղված»:

1or.am-ն այս առիթով ստացել է տարբեր ոլորտների՝ ուսուցիչների, գիտնականների, թանգարանների աշխատակիցների ու գրադարանավարների կողմից ահազանգեր: Նրանք նշում էին, որ իրենք էլ երբեք զբաղված չեն եղել թալանով, մշտապես աշխատել են բավականին ցածր աշխատավարձով, պարգևավճարների շատ մեծ կարիք ունեն, բայց իրենց վրա ուշադրություն դարձնող չկա:

Մայրաքաղաքի հիմնական դպրոցի աշխարհագրության ուսուցչուհիներից մեկը, ով չցանկացավ իր անունը հրապարակել, մեզ հետ զրույցում նշեց, որ առարկային հատկացված դասաժամերն այնքան քիչ են, որ ինքը ամսական ընդամենը 40 հազար դրամ աշխատավարձ է ստանում, քանի որ դա համարվում է կես դրույք: Այդ պայմաններով նա աշխատում է արդեն երկար տարիներ և հույսը կտրել է, որ աշխատավարձը մի օր կբարձրանա: «Սպասում եմ կենսաթոշակի տարիքս լրանա և դուրս գամ աշխատանքից, քանի որ այսպես աշխատել հնարավոր չէ: Երիտասարդ աշխարհագրագետներն էլ չեն ցանկանում դպրոց գալ, քանի որ այդ գումարով անգամ գոյություն պահպանել հնարավոր չէ: Մեզանից հետո չգիտեմ՝ ինչ կլինի, բայց որ առարկայի կարևորությունն այնքան է նսեմացվել, որ փաստացի որևէ մեկին պետք չէ: Մնում է այս առարկան էլ կրճատեն իրենք էլ հոգսից ազատվեն, մենք էլ»,- ասաց ուսուցչուհին:

Երիտասարդ ֆիզիկոս-գիտնականի հետ 1or.am-ի զրույցը կարճ տևեց: Նա ևս չցանկացավ ներկայանալ, քանի որ, իր խոսքով՝ դրանով կարող է վնասել իր կարիերային: Բայց, ընդհանրացնելով գիտական աշխարհում տիրող մթնոլորտը, նշեց, որ այնտեղ ևս սարսափելի ծանր վիճակ է, աշխատավարձը բավական ցածր է և հույս էլ չունեն, որ մի օր ավելի լավ կլինի: «Շատ գիտնականներ ստիպված դիմանում են, որպեսզի կարողանան դրսում աշխատանք գտնել ու հեռանալ երկրից, քանի որ գիտական շատ ուղղություններ կան, որոնք Հայաստանում ընդհանրապես զարգացած չեն»,- նշեց երիտասարդ գիտնականը:

Նույն վիճակում են նաև պետական և համայնքային համակարգերի միջին օղակների աշխատողները, գրադարանների, թանգարանների աշխատակիցները, որտեղ ևս աշխատավարձերն այնքան ցածր են, որ հարկերը հանելուց հետո այն մոտենում է մինիմալ աշխատավարձի չափին: Մեր զրուցակիցներից բոլորի համար էլ ընդունելի չէր վարչապետի այդ մոտեցումը, քանի որ ոչ միայն վարչապետի կաբինետի անդամները, այլև բոլորն ունեն արժանապատիվ աշխատավարձ ստանալու կարիք: Եվ այս պայմաններում պաշտպանել ոլորտների ղեկավարներին ու անտեսել սովորական աշխատողներին, նրանց կարծիքով՝ արդար չէ:

Անահիտ Խաչատրյան