Շնորհավորում եմ քաղաքացիներին, որոնք անշրջելիորեն իրենց իշխանությունը հաստատեցին ՀՀ-ում. Նիկոլ Փաշինյան
ՀԱՍԱՐԱԿՈՒԹՅՈՒՆԵրեկ ՀՀ-ում տեղի ունեցած արտահերթ խորհրդարանական ընտրությունները Հայաստանում ժողովրդավարության և ժողովրդի իշխանության բացառիկ հաղթանակը դարձան:
Այս մասին ֆեյսբուքյան ուղիղ եթերում ասաց «Իմ քայլը» դաշինքի ցուցակը գլխավորող, ՀՀ վարչապետի պաշտոնակատար Նիկոլ Փաշինյանը:
Նա նկատեց նաև, որ այսօր ընտրություններին հետևած միջազգային դիտորդները բացառիկ և աննախադեպ բարձր գնահատական են տվել ընտրություններին:
«Սա աննախադեպ իրադարձություն է երրորդ Հանրապետության պատմության մեջ, և համարում եմ, որ սա Հայաստանի աննախադեպ նվաճումն է, ՀՀ քաղաքացիների կարևորագույն նվաճումն է»,- ասաց նա և շնորհակալություն հայտնեց այն քաղաքացիներին, որոնք վստահության քվե տվեցին իրենց:
«Այդ վստահության քվեն բացառիկ պարտավորեցնող է, և մենք գիտակցում ենք՝ ահա եկել է օր ու գիշեր աշխատելու և ժողովրդի վստահությունն արդարացնելու ժամանակը, և որևէ կասկած չկա, որ մենք ամբողջությամբ նվիրված ենք այդ առաքելությանը»,- ասաց նա:
Նիկոլ Փաշինյանը նշեց, որ նոր թափով սկսելու են նախընտրական ծրագրերի իրականացումը: «Ես ուզում եմ շնորհավորել նաև ԲՀԿ-ին, ԼՀԿ-ին՝ ընտրություններում իրենց արձանագրած արդյունքների համար, ուզում եմ շնորհակալություն հայտնել այն ուժերին, որոնք ակտիվ մասնակցություն են ցուցաբերել, և ուզում եմ հավաստիացնել, որ «Իմ քայլը» կփորձի ներկայացնել նաև այն քաղաքացիներին, որոնց նախընտրած ուժերը չեն հաղթահարել խորհրդարանում հայտնվելու շեմը»,- ասաց նա:
Նիկոլ Փաշինյանը անհրաժեշտություն տեսավ, որ բացառիկ ժողովրդական և ժողովրդավարական ընտրություններն ազգային համախմբման մի նոր առիթ դառնան, և նշեց, որ ըստ էության եկել է արարման, ստեղծման, Հայաստանի տնտեսական հեղափոխությանը նոր թափ և ուժ տալու ժամանակը:
Նիկոլ Փաշինյանը նշեց, որ այսպիսի ընտրությունների ամենակարևոր առաքելությունն այն է, որ ժողովրդի կամքն արտահայտվեց, և շնորհակալություն հայտնեց նրանց, որոնք գնացին ընտրական տեղամասեր և արտահայտեցին այդ կամքը:
«Շնորհավորում եմ մեզ բոլորիս ազատ, արդար, ժողովրդավարական ընտրություններ անցկացնելու համար, շնորհավորում եմ քաղաքացիներին, որոնք անշրջելիորեն իրենց իշխանությունը հաստատեցին ՀՀ-ում»,- հավելեց վարչապետի պաշտոնակատարը:
