Ահաբեկչությունների գործողությունների ընդլայնման մեջ մեծ դերակատարություն ունեն զանգվածային լրատվամիջոցները. Կ. Աճեմյան

Օրերս Բրյուսելում տեղի ունեցած ահաբեկչությունը վերջնականորեն ցնցեց քաղաքակիրթ Եվրոպային եւ ոչ միայն: «Այսօր ամենամեծ ու սարսափելի վտանգն ահաբեկչությունն է, որը մարդկության համար լուրջ սպառնալիք է: Այն ինչ տեղի ունեցավ Բրյուսելում սարսափելի էր: Մենք հայտնվել էինք իրադարձությունների կիզակետում: Մետրոյի կայարանը, որը պայթեցվեց, Եվրախորհրդարանի շենքին շատ մոտ էր եւ կարծես դա ակնարկ էր տվյալ կառույցին»,- Orer.am-ի հետ զրույցի ժամանակ ասաց բրյուսելյան իրադարձությունների կիզակետում հայտնված հայկական պատվիրակության անդամ Կարինե Աճեմյանը:
«Համարում եմ, որ դա շատ մեծ վտանգ էր նաեւ աշխարհի համար, որովհետեւ անմեղ մարդիկ են զոհվում: Այս ամենը ոչ մի լավ բանի չի կարող հանգեցնել, եթե մեծ երկրները չհամախմբվեն եւ չասեն իրենց խոսքն ու պայքարեն այս մեծ վտանգի դեմ»,- նկատեց պատգամավորը: Ինչպես նշեց Կ. Աճեմյանը, վերջին օրը, որն աշխատանքային չհամարվեց պայթյուննների պատճառով, պետք է անցկացվեր քննարկում՝ կապված հիբրիդային պատերազմի, տեղեկատվական ահաբեկչությունների վերաբերյալ: «Այդ քննարկմանը ես ելույթ էի պատրաստել, որը վերաբերում էր նաեւ Ղարաբաղյան հարցին, ադրբեջանական ահաբեկչություններին, Ադրբեջանի հետ մեր հարաբերություններին եւ նրանց կողմից հրադադարի խախտումներին ու սահմաններում վտանգներին»,- ասաց պատգամավորը:
Կարինե Աճեմյանն ընդգծեց նաեւ միջազգային ահաբեկչությունների ընդլայնման մեջ ԶԼՄ-ների դերակատարությունը: «Ահաբեկչությունների գործողությունների ընդլայնման մեջ մեծ դերակատարություն ունեն զանգվածային լրատվամիջոցները, որովհետեւ հենց դրանց միջոցով են ահաբեկչական կազմակերպությունները սարսափ սփռում աշխարհում: Տեղեկատվական պատերազմները ոչ մի լավ բանի չեն հանգեցնելու»,- ասաց նա:

Սոսե Չանդոյան