Պավլիկ Մանուկյանի ոտքերը ցանկացել են կտրե՞լ. բժշկի մեկնաբանությունը

«Սասնա ծռեր» խմբի վիրավորված անդամ, ազատամարտիկ Պավլիկ Մանուկյանի ոտքերը ցանկացել են անդամահատել։ Այս մասին ֆեյսբուքյան իր էջում գրել է «Լրագրողներ հանուն մարդու իրավունքների» հ/կ նախագահ Ժաննա Ալեքսանյանը՝ հղում անելով քաջատեղյակ աղբյուրին։

«Այսօր ինձ պատմեցին, որ մեծ ճնշում է եղել Պավլիկ Մանուկյանին վիրահատող բժշկի վրա: Բժշկին պարտադրել են, որ վիրահատության ժամանակ կտրի հերոսի ոտքերը, սակայն բժիշկը կտրականապես դեմ է եղել և ոչ մի կերպ չի համաձայնել գնալ նման քայլի: Զարհուրելի է: Հիշում եք, Պավլիկի ոտքերին կրակել են գնդացրից, այսինքն` ի սկզբանե կար միտումը: Ի դեպ, պատմողը բավականին մոտ առնչություններ ունի իշխանության շրջանակների հետ և պնդում էր իր տեղեկության հավաստիությունը: Ամեն դեպքում ինձ շատ իրական թվաց այս պատմությունը և ես սարսափ ապրեցի մարդուն ոչնչացնելու այսպիսի ցանկությունից»,- գրել է Ալեքսանյանը:

«Էրեբունի» բժշկական կենտրոնի տնօրեն Միքայել Մանուկյանը NEWS.am–ի հետ զրույցում հերքեց այս տեղեկությունը։

«Շատ բարկացած ենք այդ տեղեկությունը լսելով։ Նման բան չի եղել եւ հնարավոր չէ, որ մեր հիվանդանոցում լինի։ Ես անձամբ ներկա եմ եղել Պավլիկ Մանուկյանի, նրա որդու ու մյուսների վիրահատություններին, և մենք արել ենք հնարավորը, որպեսզի այդ մարդիկ վերադառնան բնականոն կյանքին»,- ասաց Միքայել Մանուկյանը։

Պավլիկ Մանուկյանի փաստաբան Ինեսսա Պետրոսյանն էլ NEWS.am–ի հետ զրույցում նշեց, որ Պավլիկ Մանուկյանը վիրահատվել է միայն «Էրեբունի» բժշկական կենտրոնում՝ նշելով, որ Ժաննա Ալեքսանյանի բարձրացրած խնդրի վերաբերյալ որեւէ տեղեկություն չունի։

Նշենք, որ Պավլիկ Մանուկյանն ու նրա որդին՝ Արամ Մանուկյանը այժմը «Դատապարտյալների հիվանդանոց» ՔԿՀ–ում են։ Նրանք ոտքերից վիրավորվել էին հուլիսի 26–ին եւ դուրս բերվել ՊՊԾ գնդի տարածքից։