«Ես եմ իմ քաղաքի զբոսավարը» ծրագրի երիտասարդ կամավորները ստացան հավաստագրեր

«Թանգարանային գիշեր» ծրագրով միջոցառումների ժամանակ Երևան քաղաքի պատմության թանգարանում ամփոփվել է ամիսներ առաջ մեկնարկած «Ես եմ իմ քաղաքի զբոսավարը» երիտասարդ կամավորների ծրագիրը:

Հանդիսավոր արարողության ընթացքում երիտասարդ զբոսավարներն արժանացել են հավաստագրերի: Ծրագիրն իրականացվել է Երևանի քաղաքապետարանի աշխատակազմի տուրիզմի բաժնի նախաձեռնությամբ՝ «Հայ զբոսավարների գիլդիա» հասարակական կազմակերպության հետ համատեղ:
Շնորհակալություն հայտնելով բոլորին եռամսյա դասընթացներին մասնակցելու համար՝ Երևանի քաղաքապետի օգնական Մարիա Բարաղամյանը նշել է. «Հավաստագրերի հանձման այս արարողությունը խորհրդանշական է, քանի որ դուք ծրագրի առաջին շրջանավարտներն եք: Տուրիզմի բաժնի այս նախաձեռնությունը լինելու է շարունակական, և դեռ շատ երիտասարդներ հնարավորություն կունենան անցնելու այս ճանապարհով: Ձեզ մաղթում եմ, որպեսզի միշտ լինեք քաղաքի կողքին, սիրեք Երևանը, մոտ ապագայում շատ արագ իրացվեք և ձեր ուրույն տեղը գտնեք զբոսաշրջության մեծ ոլորտում՝ արդյունավետորեն կիրառելով ստացված գիտելիքները, քանի որ, վստահ եմ, որ ձեզնից յուրաքանչյուրն արդեն իսկ պատրաստ է դառնալու մեր մայրաքաղաքի զբոսավարը»:
Նշենք, որ ծրագրի ավելի քան 150 դիմորդներից ընտրվել են լավագույն 30-ը, ովքեր սովորում են զբոսաշրջության ոլորտում կամ հետաքրքրված են դրանով: Ծրագրի ընթացքում նրանք ուսումնասիրել են էքսկուրսավարի վարպետությունը, ծանոթացել այդ մասնագիտությանը, առանձնահատկություններին և վարվեցողության կանոններին, ինչպես նաև Երևանի պատմությանը, ճարտարապետությանը, հնագիտական հուշարձաններին, այցելել մի շարք թանգարաններ և զբոսաշրջային հետաքրքրություն ներկայացնող վայրեր: Հիմա արդեն նրանք պատրաստ են ամբողջությամբ ներկայացնելու մեր մայրաքաղաքը աշխարհի տարբեր երկրներից Երևան ժամանող զբոսաշրջիկներին:

Երևանի քաղաքապետարանի տեղեկատվության
և հասարակայնության հետ կապերի վարչություն