Ամեն րոպե կարող է լուրջ զարգացումներ լինեն. Ալեք Ենիգոմշյան

Արդեն 32 ժամից ավելի է, որ ոստիկանության ՊՊԾ գնդում գտնվող «Սասնա ծռեր» խմբին չի տրվում էլեկտրական հոսանք, սնունդ, բժշկական ծառայություն. գիշերվանից սկսած նաեւ հեռախոսակապ չունեն: Այս մասին, այսօր՝ հուլիսի 25-ին, Խորենացի փողոցում տեղի ունեցած բացօթյա ասուլիսի ժամանակ նշել է «Հիմնադիր խորհրդարանի» անդամ Ալեք Ենիգոմշյանը:

Նրա խոսքով, սա իշխանությունների կողմից սրացման քայլեր են: «Նախօրեին փորձ է արվել մոտենալ տարածքին եւ պատ քանդել: Այս առավոտ սրացման եւ մթնոլորտի թեժացման քայլ է արվել. ռազմական ուղղաթիռը ցածրից թռել է ՊՊԾ տարածքում: Սա ցույց է տալիս, որ վարչախումբը հակված չէ խաղաղ մթնոլորտում շարունակել բանակցությունները: Նման ճնշումներով միայն վտանգավոր սրացման ուղղությամբ են գնում: Ամեն րոպե կարող է լուրջ զարգացումներ լինեն: Մենք միայն հույս ունենք, որ ողջամտությունը կտիրապետի վարչախմբի մոտ եւ նրանք չեն գնա հայ տղաների եւ հայ ոստիկանների արյունահեղությանը»,-ասել է նա:

Այնուհետեւ համակարգող խորհրդի նախաձեռնող խմբի անունից հայտարարություն է ընթերցել Ալբերտ Բաղդասարյանը: Նա նշել է, որ «Սասնա ծռեր» խումբը դիմել է ժողովրդի ապստամբությունից բխած իրավունքի իրացմանը, իսկ իշխանությունները խախտելով բոլոր միջազգային նորմերը, փորձում են տղաներին մատնել սովամահության:

«Թափված ամեն կաթիլ արյան համար, խեղված յուրաքանչյուր ճակատագրի համար պատասխանատու է Սերժ Սարգսյանն անձամբ՝ անկախ նրանից թե ում արյունն է դա լինելու:

Առաջարկում ենք Սերժ Սարգսյանին, որպեսզի մինչեւ այսօր ժամը 20.00-ն լուծվեն ապստամբ «Սասնա ծռերի» սննդի, ջրի, դեղորայքի եւ բուժօգնության հարցերը:

Հայ ժողովրդին կոչ ենք անում այսօր ժամը 20-ին հավաքվել Խորենացի փողոցում եւ քննարկել հետագա քայլերը:

Դիմում ենք օտարերկրյա դեսպաններին, միջազգային կազմակերպություններին, Կարմիր խաչին, որպեսզի ակտիվ միջամտություն ցուցաբերեն խնդիրը բանակցությունների ճանապարհով խաղաղ լուծելու համար:

Մենք կսկսենք անհնազանդության գործընթաց, զինված հակամարտությունը կտեղափոխենք քաղաքացիական դաշտ, քաղաքական հարթություն: Երեւանում կստեղծենք բազմաթիվ օջախներ»,-հայտարարել է Բաղդասարյանը:

Նշենք, որ շուրջ 200 ժամ է անցել Երեւանի Խորենացի փողոցում տեղի ունեցած միջադեպից, որտեղ զինված խումբը գրոհով վերցրել է ոստիկանության ՊՊԾ գունդը։

Նախօրեին ՊՊԾ գնդի տարածք մտած զինված խումբը այրել է գնդի ծառայողական մեքենաներից մեկը եւ վառվող մեքենան դուրս բերել փողոց: Ենիգոմշյանը հայտարարել է, որ մեքենան այրելը բողոքի նշան էր, քանի որ զինյալներին զրկել են ուտելիքից, բժշկական օգնությունից, անջատել են գնդի էլեկտրամատակարարումը։ Այդուհանդերձ, ըստ նրա, բանակցությունները շարունակվում են:

Հուլիսի 23-ին զինված խումբ ազատ է արձակել վերջին 4 պատանդներին, այդ թվում ՀՀ փոխոստիկանապետ, գեներալ-մայոր Վարդան Եղիազարյանին եւ Երեւանի փոխոստիկանապետ Վալերի Օսիպյանին: