Հայտնի է Երրորդմասցի Լյովիկի եւ նրա երկու ընկերների սպանության գործով առաջին նիստի օրը

Քրեական հեղինակություն Երրորդմասցի Լյովիկ եւ նրա երկու ընկերների սպանության գործով առաջին նիստի օրը հայտնի է: Էրեբունի եւ Նուբարաշեն վարչական շրջանների ընդհանուր իրավասության դատարանում մարտի 30-ին ժամը 12:00-ին նշանակվել է այս գործով առաջին դատական նիստը: Գործը քննվելու է նույն դատարանի դատավոր Արտուշ Գաբրիելյանի նախագահությամբ: Այս մասին տեղեկանում ենք Դատական տեղեկատվական համակարգից: Սույն գործով նախաքննությունն ավարտվել է եւ գործը մարտի 12-ին ուղարկվել է դատարան:

Երրորդմասցի Լյովիկն ու նրա երկու ընկերները սպանվել են 2015 թվականի մարտի 4-ին՝ «Նուբարաշեն» քրեակատարողական հիմնարկի մոտակայքում: Սպանության կասկածանքով ձերբակալվել, ապա կալանավորվել են Վահան Հակոբյանը («Գաստիկ» մականունով), Սարգիս Հախանումյանն («Տլե») ու Սարգիս Գրիգորյանը (Ծգլ): Դատական տեղեկատվական համակարգում հրապարակվել է սույն գործով մեղադրական եզրակացության համառոտ բովանդակությունը որի համաձայն՝ գործով երեք մեղադրյալները Գաստիկը, Ծգլեն եւ Տլեն՝ նախնական համաձայնությամբ ապօրինի ձեռք են բերել եւ պահել զենք: Ըստ այդմ՝ 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել Լեւոն Ղազարյանի (Երրորդմասցի Լյովիկի,-հեղ.), Դրաստամատ Թադեւոսյանի (Դերո մականունով) եւ Մեսրոպ Նազարյանցի (Բարաքցի Մոս) ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:

Վահան Հակոբյանին, Սարգիս Հախանումյանին եւ Սարգիս Գրիգորյանին մեղադրանք է առաջադրվել ՀՀ Քրեական օրենսգրքի 104-րդ հոդվածի 2-րդ մասի 1, 6, 7 կետերով: Խափանման միջոց է ընտրվել կալանավորումը: Գործով երեք մեղադրյալներն են չեն ընդունում իրենց առաջադրված մեղադրանքը եւ նախաքննության ողջ ընթացքում հրաժարվել են ցուցմունք տալուց: