Իսրայելի խորհրդարանական ընտրություններում վերջնական մասնակցությունը կազմել է 77,7 տոկոս

Հոկտեմբերի 27-ին կայացած 26-րդ գումարման Քնեսեթի (Իսրայելի խորհրդարան) ընտրություններին մասնակցությունը կազմել է 77,7%, ինչը ամենաբարձր ցուցանիշն է 1999 թվականից ի վեր: Այս մասին հայտնում է Իսրայելի հեռուստատեսության 12-րդ ալիքը, հաղորդում է ՏԱՍՍ-ը:

Հեռուստաալիքը նշում է, որ 2022 թվականի նոյեմբերին Իսրայելում տեղի ունեցած նախորդ խորհրդարանական ընտրություններում մասնակցությունը կազմել էր 70,63%:

Kan-11 պետական հեռարձակող ընկերության էքզիթ փոլը Իսրայելի վարչապետ Բենյամին Նեթանյահուի գլխավորած «Լիկուդ» կուսակցությանը կանխատեսում է առաջին տեղը ընտրությունների արդյունքներով: Դրա տվյալների համաձայն՝ այն ստանում է 25 մանդատ 120-տեղանոց խորհրդարանում, իսկ ընդդիմությունից վարչապետի գլխավոր մրցակից Գադի Այզենկոտը «Յաշար» կուսակցությամբ զբաղեցնում է երկրորդ տեղը՝ ստանալով 21 տեղ: Միևնույն ժամանակ ընդդիմադիր բլոկը գերազանցում է ներկայիս իշխող կոալիցիայի կուսակցությունների բլոկին: Kan-11-ի էքզիթ փոլի համաձայն՝ ընդդիմադիրներն ընդհանուր առմամբ ունեն 53 տեղ, Նեթանյահուի բլոկը՝ 50 տեղ:

Քնեսեթում ընդհանուր առմամբ 120 տեղ կա, իշխող մեծամասնություն ձևավորելու համար անհրաժեշտ է 61 մանդատ, որը, ըստ էքզիթ փոլերի, չի ստանում քաղաքական ուժերից և ոչ մեկը: Սպասվում է, որ Կենտրոնական ընտրական հանձնաժողովը ձայների հաշվարկի նախնական արդյունքների մասին կհայտնի հոկտեմբերի 29-ին, իսկ ընտրական ընթացակարգի վերջնական արդյունքները պետք է պաշտոնապես հրապարակվեն ոչ ուշ, քան նոյեմբերի 4-ը: Պաշտոնական արդյունքները ստանալուց հետո երկրի նախագահ Իսհակ Հերցոգը խորհրդակցություններ կսկսի Քնեսեթ անցած կուսակցությունների ներկայացուցիչների հետ, որոնց արդյունքներով պատգամավորներից մեկին կհանձնարարի ձևավորել նոր կառավարական կոալիցիա:

Վարչապետի թեկնածու, որպես կանոն, դառնում է առավելագույն թվով պատգամավորական մանդատներ ունեցող կուսակցության առաջնորդը, սակայն նախարարների կաբինետի ձևավորումը նախագահը կարող է հանձնարարել նաև այն քաղաքական գործչին, ում կուսակցությունը ամենաշատ ձայները չի ստացել, բայց ի վիճակի է կոալիցիա ստեղծել: Վարչապետի առաջին թեկնածուին կտրամադրվի 28 օր կառավարություն ձևավորելու համար՝ այդ ժամկետը երկու շաբաթով երկարաձգելու հնարավորությամբ: Անհաջողության դեպքում նախագահն այդ իրավունքը կփոխանցի մեկ այլ պատգամավորի, ում խնդրի լուծման համար կտրամադրվի երկու շաբաթ՝ առանց երկարաձգման հնարավորության: Եթե նույնիսկ այդ դեպքում 61 պատգամավորական մանդատ վերահսկող կոալիցիայի ձևավորում տեղի չունենա, ապա 90 օր անց կնշանակվեն նոր ընտրություններ: