Ինչ է հայտարարագրել ՔՊ-ից Սահմանադրական դատարան տեղափոխված Վլադիմիր Վարդանյանը

Սահմանադրական դատարանի դատավոր Վլադիմիր Վարդանյանը 2026 թվականի մայիսի 28-ին Կոռուպցիայի կանխարգելման հանձնաժողով է ներկայացրել 2025 թվականի գույքի, եկամուտների, ծախսերի և շահերի տարեկան հայտարարագիրը, այս մասին 24News-ը տեղեկանում է հանձնաժողովի կայքից։

Վարդանյանը հաշվետու տարվա սկզբում հայտարարագրել է բնակարան Երևանում՝ միանձնյա սեփականության իրավունքով։ 2025 թվականի նոյեմբերի 27-ին ձեռք է բերել բնակարան Երևանում, որը նույնպես միանձնյա սեփականության իրավունքով է, այսինքն՝ հաշվետու տարվա ավարտին ունեցել է երկու բնակարան։

Վարդանյանը երրորդ անձին սեփականության իրավունքով պատկանող տրանսպորտային միջոց VOLKSWAGEN մակնիշի ավտոմեքենա է հայտարարագրել, որը թողարկվել է 2022 թվականին։ Մեքենայի սեփականատիրոջ մասին տվյալներ առկա չեն, ինչպես նաև առկա չեն տվյալներ նաև սեփականատիրոջ և Վլադիմիր Վարդանյանի  միջև առկա կապի բնույթի մասին։

ՍԴ դատավորը «ԱՐՍԱԼԵԴԱ» ՍՊԸ-ից ստացել է 53,974,300 դրամ փոխառություն։ Փոխառության տոկոսադրույքը կազմել է 12.85։ Կողմերի միջև առկա կապի բնույթը պաշտպանված է։ Համացանցում առկա տեղեկության համաձայն՝ «ԱՐՍԱԼԵԴԱ» ՍՊԸ-ն գրանցված է 2019 թվականի փետրվարի 27-ից, գործում է Երևանում: Ընկերությունը մասնագիտանում է շենքերի և այլ շինությունների կառուցման ոլորտում:

Վլադիմիր Վարդանյանը հաշվետու տարվա սկզբում բանկային հաշիվներից մեկում ունեցել է 1,001 դրամ, որը տարվա վերջում կազմել է 927,463.27 դրամ։ Բանկային հաշիվներից մեկում ունեցել է 1,310.03 եվրո, որը տարվա վերջում կազմել է 281 եվրո։

ՍԴ դատավորը հայտարարագրել է կանխիկ 2,850 դոլար, որը տարվա վերջում կազմել է 3,400 դոլար, 1,350,000 դրամ, որը տարվա վերջում կազմել է 2,260,000 դրամ և 4,650 եվրո, որը տարվա վրջում կազմել է 4,350 եվրո։

Հաշվետու տարվա ընթացքում Վլադիմիր Վարդանյանը եկամուտ է ստացել երկու աղբյուրից։ Ազգային ժողովից որպես աշխատավարձ նա ստացել է 15,281,690 դրամ, իսկ Ֆինանսների նախարարությունից որպես եկամտահարկ ստացել է 3,315,083.7 դրամ։

Հիպոտեկով բնակարան գնելու համար Վլադիմիր Վարդանյանը բանկերից մեկից ստացել է վարկ, որի մայր գումարի մնացորդը կազմել է 46,753,749 դրամ։

Վարկի մարմանն ուղղված վճարումների համար ծախսել է 6,774,020 դրամ։

Վլադիմիր Վարդանյանը Հայոց ցեղասպանության թանգարան-ինստիտուտի, «Սահմանադրական մշակույթ» միջազգային վերլուծական կենտրոն հիմնադրամի, «Հանրային իրավունքի կենտրոն» գիտակրթական հիմնադրամի և «Միջազգային իրավունքի հայկական ասոցիացիայի» հոգաբարձուների խորհրդի անդամ է։

Հիշեցնենք, որ Վլադիմիր Վարդանյանը 2026 թվականի մարտի 25-ին Հանրապետության նախագահի առաջարկությամբ Հայաստանի Հանրապետության Ազգային ժողովի կողմից ընտրվել է Հայաստանի Հանրապետության Սահմանադրական դատարանի դատավոր:

Նշենք, որ նա Սահմանադրական դատարանի որոշմամբ չի մասնակցում քաղաքական յոթ ուժերի դիմումների դատաքննությանը, որով վիճարկվում է հունիսի 7-ի ԱԺ ընտրությունների արդյունքները։

Նշվել է, որ նրա մասնակցությունը գործի քննությանն անհնարին է, քանի որ կարող է «կանխակալ վերաբերմունք ունենալ» դատավարության կողմերի նկատմամբ:

Վլադիմիր Վարդանյանը Սահմանադրական դատարան է տեղափոխվել խորհրդարանից՝ կառավարող «Քաղաքացիական պայմանագիր» խմբակցությունից։