«Փորձագետը գնահատել է Հայաստանում «ապատեղեկատվության դեմ պայքարելու» ԵՄ-ի ծրագրերը»

«Արագ արձագանքման խումբ» ուղարկելու Երևանի խնդրանքը Բրյուսելին  և հետագայում ԵՄ–ից «հիբրիդային սպառնալիքների» դեմ պայքարի առաքելություն ուղարկելու հաստատումը լրիվ տեղավորվում է Նիկոլ Փաշինյանի նախընտրական քարոզչություն շրջանակներում, vz.ru–ի հետ զրույցում ասել է Սանկտ Պետերբուրգի պետական ​​համալսարանի միջազգային հարաբերությունների ֆակուլտետի եվրոպական ուսումնասիրությունների ամբիոնի պրոֆեսոր և «Վալդայ» քննարկման ակումբի փորձագետ Ստանիսլավ Տկաչենկոն։ «Իրենց նախընտրական ռազմավարության մեջ Նիկոլ Փաշինյանը և նրա կուսակցությունը հույսը դնում են այն քաղաքացիների վրա, ովքեր կարծում են, որ Երևանի ապագան կապված է ԵՄ-ի կամ ԱՄՆ-ի հետ։ Հայաստանի վարչապետին օգնում են եվրոպացի այն քաղաքական գործիչները, որոնք օգտագործում են յուրաքանչյուր հնարավորություն Ռուսաստանին վնասելու համար», - նշել է  Տկաչենկոն։

Նրա կարծիքով Երևանի խնդրանքը Բրյուսելին քաղաքական որոշում է։ «Նպատակն է ազդանշան ուղարկել ընտրողներին. Փաշինյանը «գնում է դեպի ԵՄ» և բնակչությանը առաջարկում է եվրոպական ընտրություն», - հավելել է զրուցակիցը։

Տկաչենկոն հիշեցրել է, որ նմանատիպ մոտեցում նախկինում ցուցաբերել են, ի թիվս այլոց, Վլադիմիր Զելենսկին, իսկ նրանից առաջ Պետրո Պորոշենկոն, ինչպես նաև Մայա Սանդուն Մոլդովայում։ «Այսպիսով, սա նույն «մաշված ձայնասկավառակ»–ի օգտագործում է, սակայն ռուսաֆոբիան Հայաստանում չի արմատավորվել», - պարզաբանել է նա։ «Կրկնեմ, իմ կարծիքով, Հայասատանում ԵՄ առաքելության ստեղծումն ավելի շատ ընտրական հարց է, քան Հայաստանի «վերանայում» ռուսաֆոբիայի տեսակետից», - կարծիք է հայտնել փորձագետը։

Խոսելով Մոսկվայի դիրքորոշման մասին նա հիշատակել է Վլադիմիր Պուտինի և Փաշինյանի միջև վերջերս տեղի ունեցած հանդիպումը, որի ընթացքում Ռուսաստանի առաջնորդը հայկական պատվիրակությանը բացատրել է, թե ինչու պետք է Երևանը հաշվի առնի Ռուսաստանի շահերը, այլ ոչ թե թշնամական քաղաքականություն վարի։

«ՀՀ վարչապետը, մի կողմից, ցանկանում է, որ ԵՄ-ն «ողջունի» իրեն, մյուս կողմից պահպանի հայկական ապրանքների մուտքը ռուսական շուկա։ Մենք փորձից գիտենք, թե ո՞ւր կարող է տանել նման քաղաքականությունը։ Ես կարծում եմ, որ Ռուսաստանի ղեկավարությունը չի համաձայնվի Փաշինյանի հետ։ Դա են ցույց  տալիս Պուտինի և փոխվարչապետ Ալեքսեյ Օվերչուկի խոսքերը, որ Երևանը ստիպված կլինի ընտրություն կատարել», - եզրափակել է Տկաչենկոն։

Ավելի վաղ Եվրոպական Միության խորհուրդը հաստատել էր Հայաստան նոր քաղաքացիական առաքելության տեղակայումը «հիբրիդային սպառնալիքների», այդ թվում ապատեղեկատվության, կիբեռհարձակումների և անօրինական ֆինանսական հոսքերի դեմ պայքարելու համար։ Ասվում է, որ առաքելությունը նախատեսված է հանրապետության ժողովրդավարական դիմադրողականությունը ամրապնդելու համար։

Նյութը հրապարակման պատրաստեց Կամո Խաչիկյանը

www.1or.am