«Վենսի Հայաստան կատարած այցից հետո Փաշինյանը սկսել է խոսել Ռուսաստանի հետ բարեկամության արժեքի մասին»

Հետխորհրդային տարածքում քննարկվում է ՀՀ վարչապետ Նիկոլ Փաշինյանի հետ նոր հարցազրույցը։ Պատասխանելով Հայաստանի Հանրային հեռուստատեսության լրագրողների հարցերին նա շեշտել է Երևանի և Մոսկվայի միջև հարաբերությունների արժեքը, գրում է ntv.ru–ն։ «Ռուսաստանին կամ Ռուսաստանի շահերին վնաս հասցնելը մեր օրակարգում չի եղել, չկա և չի լինի։ Սա բացառվում է։ Ոչ ոք չի կարող մեզ ներքաշել Ռուսաստանի դեմ գործողությունների տրամաբանության մեջ», - հայտարարել է Նիկոլ Փաշինյանը։ Հատկանշական է այն, որ այդ խոսքերը հնչել են ԱՄՆ փոխնախագահի Հայաստան կատարած այցից անմիջապես հետո, որի ընթացքում Վենսը և Նիկոլ Փաշինյանը համաձայնության են եկել ոչ միայն ատոմային էներգիայի ոլորտում համագործակցության, այլ նաև Հայաստանին ամերիկյան հետախուզական անօդաչու թռչող սարքերի մատակարարման վերաբերյալ։ ԱՄՆ-ը Հայաստանին կմատակարարի փոքր մոդուլային ռեակտորներ 9 միլիարդ դոլարով։ Ներկայումս «Ռոսատոմի» կողմից կառավարվող Մեծամորի ատոմակայանը արտադրում է Հայաստանի էլեկտրաէներգիայի գրեթե կեսը։ Եվրամիությունը վաղուց է պնդում  Մեծամորի ատոմակայանի փակման վրա պնդելով, որ այն չի համապատասխանում միջազգային անվտանգության պահանջներին։ 
Ի՞նչ են ասում փորձագետները այս առիթով:

Կարեն Իգիթյան, քաղաքագետ. «Երկարաժամկետ հեռանկարում Փաշինյանն արդեն կատարել է իր ընտրությունը, քանի որ մենք հասկանում ենք այն իրավիճակը, երբ իշխող մեծամասնության կողմից խորհրդարանում ընդունվում է օրենք, որում նշվում է, որ Հայաստանը ձգտում է միանալ Եվրամիությանը»։

Բենիամին Մաթևոսյան, քաղաքագետ և Alphanews հեռուստաալիքի վերլուծաբան. «Իրականում և՛ Հայաստանի իշխանությունները, և՛, ամենայն հավանականությամբ, երկրի բնակչության զգալի մասը լավ գիտակցում են, որ ԵՄ-ին միանալու ճանապարհ չկա։

Հայաստանը Եվրասիական տնտեսական միության անդամ է, ինչը թույլ է տալիս նրան տարեկան ստանալ մոտ 200 միլիոն դոլարի մաքսային տուրքեր։ ԵՄ-ին միանալով երկիրը կհեռացվի ԵԱՏՄ-ից։ Երևանի և Վաշինգտոնի միջև մեկ այլ համաձայնագիր, որը Փաշինյանը ստորագրել է Վենսի հետ, վերաբերում է ռազմատեխնիկական համագործակցության զարգացմանը։ Ինչպե՞ս է դա համադրվելու այն փաստի հետ, որ Ռուսաստանն է մնում երկրի զենքի և ռազմական տեխնիկայի հիմնական մատակարարը։ Եվ այն փաստի հետ, որ 102-րդ ռուսական ռազմաբազան է տեղակայված  Շիրակում՝ ԱՊՀ հարավային թևի անվտանգությունն ու Անդրկովկասում կայունությունն ապահովելու համար»։

Արման Աբովյան, քաղաքական վերլուծաբան. «Ամերիկացիները Հայաստանը դիտարկում են, դա ակնհայտ է, որպես գործիք Հարավային Կովկասում գերիշխելու և ռուսներին դուրս մղելու իրենց ծրագրերն իրականացնելու համար»։

Նյութը հրապարակման պատրաստեց Կամո Խաչիկյանը

www.1or.am