Խոշտանգում փաշինյանական ձևով

Հայաստանի գործող իշխանությունները, ձերբակալելով Հայ առաքելական եկեղեցու սպասավորներին, նրանց նաև խոշտանգում են բանտերում։ Նախօրեին հայտնի դարձավ, որ 2 տարվա ազատազրկման դատապարտված Միքայել արքեպիսկոպոս Աջապահյանը վիրահատության կարիք ունի։ Այսպիսի եզրահանգման են եկել Առողջապահության նախարարության ենթակայությամբ գործող «Քրեակատարողական բժշկության կենտրոնի» բժիշկները։

Ընդդիմադիր պատգամավոր Գառնիկ Դանիելյանը բարձրաձայնել էր այդ մասին Ազգային ժողովի ամբիոնից, ինչից հետո արդարադատության նախարարը լրագրողների հետ զրույցում հայտարարել էր, թե համապատասխան դիմում չեն ստացել, մինչդեռ պարզում է, որ Միքայել Աջապահյանի փաստաբաններն առնվազն 3 դիմում են ներկայացրել «Քրեակատարողական բժշկության կենտրոն», ընդ որում, դեռևս հոկտեմբերի 6-ին, ապա նոյեմբերի 6-ին և 10-ին։ Նոյեմբերի 28-ին էլ պատասխան են ստացել, որով սրբազանին առաջարկում են վիրահատվել պետության միջոցներով, մինչդեռ Միքայել Աջապահյանը դիմել էր իրեն «Իզմիրլյան» կենտրոն տեղափոխելու և իր միջոցներով ավելի որակյալ վիրահատություն իրականացնելու։

Ըստ էության, թե արդարադատության նախարարի հայտարարությունը և թե դրանից հետո իշխանությունների պատասխանը վկայում են, որ գործող իշխանություններն ամեն ինչ փորձելու են անել վնասելու սրբազաններին, նույնիսկ անազատության մեջ վտանգելու նրանց առողջությունը, քանի որ ռեալ վտանգ են տեսնում Միքայել սրբազանի և մյուս կալանավորված ու դեռևս չկալանավորված եպիսկոպոսների գործունեությունից։ Հենց սա է, որ վկայում է Հայաստանում քաղաքական բանտարկյալների առկայության փաստը, ինչպես նաև այն, որ Նիկոլ Փաշինյանը առաջանցիկ տեմպերով սլանում է դեպի բռնապետություն՝ այդ ճանապարհին փորձելով հեռացնել իր բոլոր ընդդիմախոսներին։

Տաթևիկ Բադալյան