Գողացել են «Lincoln»-ի կողային հայելիները
ՀԱՍԱՐԱԿՈՒԹՅՈՒՆ
Այսօր՝ հոկտեմբերի 16-ին, Երևանում հերթական ավտոմեքենայի թալանման դեպքն է տեղի ունեցել: Այս անգամ` Քանաքեռ-Զեյթուն վարչական շրջանում:
Ինչպես դեպքի վայրից հայտնում է ֆոտոլրագրող Գագիկ Շամշյանը, Ազատության պողոտա 2-րդ շենքի դիմաց՝ ժողովրդին ավելի շատ հայտնի Արաբկիրի զինկոմիսարիատի մոտից, գիշերը անհայտ անձը կամ անձինք գողացել են շենքի բակում կայանված «Lincoln» մակնիշի ավտոմեքենայի կողային հայելիները:
Առավոտյան ավտոմեքենան շահագործող, Երևանի բնակիչ Դավիթ Հ.-ն աշխատանքի գնալիս նկատել է, որ հայելիները գողացել են, իսկ դիմապակու վրա թողել են տելեգրամյան ալիք, որպեսզի տուժած քաղաքացին կապ հաստատի գողի կամ գողերի հետ և գումարի դիմաց հայելիները հետ վերադարձնեն:
Գողությունը տեղի է ունեցել Քանաքեռ-Զեյթուն վարչական տարածքում ու արդյոք ՀՀ ՆԳՆ ոստիկանության համայնքային ոստիկանության գլխավոր վարչության Քանաքեռ-Զեյթունի բաժնի ծառայողները կբացահայտեն այս հանցագործությունը, թե ոչ, գողության վայրի հարևանությամբ բնակվող բնակիչները հույս չունեն, ասելով.
«էդ որ ավտոյի թալանման դեպքն են բացահայտում, որ սա էլ բացահայտեն, էն էլ Քանաքեռ-Զեյթունի ոստիկանները:
Ուրիշ բաժիններում գոնե բացահայտում են, գողացած ապրանքներ հայտնաբերում, գործը տալիս են քննչական, քննչականն էլ գործ ա հարուցում, գողություն անողին կամ անողներին կալանավորելու համար դիմում է դատարան, իսկ մեր դատարանը՝ ինչպես հայտնի «Կովկասի գերուհին» ֆիլմում կասեր Ցանցառը՝ «աշխարհի ամենաարդար դատարանն է», բաց են թողնում, իսկ հետո հանրության մեջ տպավորություն է ստեղծվում, թե ոստիկաններն ու քննիչները չեն աշխատում:
