Նոր քաղաքական ուժ. որքանո՞վ այն կօգնի ընդդիմության միավորմանը

Մարդու իրավունքների նախկին պաշտպան Արման Թաթոյանը այսօր մեծ հավաք է հրավիրել և «Միասնության թևեր» անունով նախաձեռնություն է սկսում։ Առաջիկայում դա դառնալու է կուսակցություն, որպեսզի մասնակցի խորհրդարանական ընտրություններին։ Նախաձեռնության մեջ հիմնականում Թաթոյանի ժամանակ ՄԻՊ գրասենյակում աշխատած մարդիկ են, Պետեկամուտների կոմիտեի նախկին նախագահ Դավիթ Անանյանը։

Որ այս գործիչները համատեղ ինչ-որ ուժ են նախաձեռնում, հայտնի էր բավական վաղուց, օրեր առաջ Թաթոյանը տեսաուղերձ հրապարակեց, նշելով, որ միայն իրավապաշտպան գործունեությունը բավարար չէ Հայաստանի խնդիրները լուծելու համար, ուստի և մտնում է ակտիվ քաղաքականություն։ Թաթոյանը, ի տարբերություն Փաշինյանի, վարկաբեկված չէ, բավական բարձր համարում և հեղինակություն ունի, հաշվի են առնում նաև օմբուդսմենի պաշտոնում նրա արդյունավետ աշխատանքը, իշխանություններին դիմադրելը, և զարմանալի չէ, որ իշխանական քարոզչամեքենան հենց առաջին վայրկյաններից սկսեց թիրախավորել Արման Թաթոյանին՝ նրան փորձելով կապել նախկինների հետ։ Թաթոյանը, հիշեցնենք, մի քանի տարի արդարադատության փոխնախարարը եղել Սերժ Սարգսյանի պաշտոնավարման օրոք։

Բնական է, որ իշխանությունը փորձելու է, «նախկիններ-ներկաներ» դիսկուրսը չարաշահել և առաջ մղել սեփական օրակարգը։ Մի կողմից, իհարկե, լավ է, որ նոր ընդդիմադիր քաղաքական ուժեր են մուտք գործում ասպարեզ։ Մյուս կողմից էլ, դա իր հետ նաև վտանգներ է պարունակում։ Ըստ էության, այդ ուժերը, որոնք մի շատ մեծ ռեսուրսների չեն տիրապետում, խորհրդարանական ընտրությունների ժամանակ կարող են լուրջ ձայներ տանել ընդդիմությունից, արդյունքում փոշիացնել ընդդիմադիր ընտրազանգվածի ձայները, ինչն էլ անհրաժեշտ է հենց Նիկոլ Փաշինյանին։ Եվ այս իմաստով նոր կուսակցությունների բացումը պետք է ուղեկցվի նաև ընդդիմության ընդհանուր համախմբման օրակարգով, որովհետև միայն դա է, որ հնարավորություն կտա Հայաստանի և հայ ժողովրդին ազատվել Նիկոլ Փաշինյանի ներկայությունից։

Շուշան Գալստյան