«Շիշ բռնողին» կարող են հեռացնել ՔՊ-ից

Ալեն Սիմոնյան-Հայկ Սարգսյան դիմակայությունն առաջիկայում նոր երանգ է ստանալու։ Հիշեցնենք, «Քաղաքացիական պայմանագիրը» նկատողություն էր հայտարարել «Շիշ բռնող» մականունով պատգամավորին, բայց և մերժել նրա պահանջը՝ նման մի նկատողություն էլ հայտարարել Ալեն Սիմոնյանին։ Օրերս Հայկ Սարգսյանը լրագրողների հետ ճեպազրույցում բավականին սենսացիոն մանրամասներ էր հայտնել և կուսակիցներին ընդհուպ մեղադրել իր դեմ տեղեկատվական կեղտոտ արշավ իրականացնելու մեջ։

Հարցազրույցը, մեր աղբյուրների փոխանցմամբ, բավականին լուրջ մտահոգություններ է առաջացրել «Քաղպայմանագրում»։ Վստահ են, որ «Շիշ բռնողը» և նրա ընտանիքի անդամները մտադիր չեն ընկրկել և անհրաժեշտության դեպքում կգնան մինչև վերջ։

Առաջիկայում «Քաղպայմանագիրը» պատրաստվում է նախաձեռնող խմբի կամ վարչության նիստերից որևէ մեկի ընթացքում քննարկել Հայկ Սարգսյանի վարքագիծը և չի բացառում, որ նրան հեռացնեն կուսակցությունից։ Ըստ ամենայնի, նման զարգացում կարող է լինել արդեն խորհրդարանական ընտրություններից առաջ, երբ Հայկ Սարգսյանի թեկնածությունն ընդհանրապես չընդգրկեն ՔՊ նախընտրական ցուցակում։ Վերջինս, ի դեպ, հրաշալի տեղյակ է իր դեմ նյութվող դավերից, մերձավոր շրջապատում էլ ասել է, թե բոլորովին դեմ չէ լքել «Քաղաքացիական պայմանագիրը», քանի որ Նիկոլ Փաշինյանի օրերը հաշված են, իսկ ինքը չի ցանկանում դառնալ Փաշինյանի հանցագործությունների պատասխանատուն։

Նա նաև նշել է, որ բոլորովին դեմ չի լինի, եթե ՔՊ-ն իրեն հեռացնի։ Իսկ Փաշինյանն ինքն էլ ցանկանում է ազատվել Սարգսյաններից՝ ոչ միայն Հայկ և Նաիրի Սարգսյաններից, այլև նրանց հորից՝ Զարեհ Սարգսյանից, որին բավականին շատ բան է պարտք «հեղափոխության» օրերից սկսած, խոստացել էր բարձր պաշտոնի նշանակել, բայց այդպես էլ չէր նշանակել։

Լիլիթ Հարությունյան