Արցախի Հանրապետության նախկին նախագահներին տեղափոխել են Բաքու․ պատմության այս օրը (03 հոկտեմբեր)

ՈՐՈՇ ՏՈՆԵՐ

Գերմանիա – Գերմանական միասնության օր,
Իրաք – Ազգային օր,
Հյուսիսային և Հարավային Կորեաներ – Պետության կազմավորման օր:

ՀԱՅԱՍՏԱՆՈՒՄ

1908 – ծնվել է Ամենայն հայոց կաթողիկոս Վազգեն Ա-ն։

1926 – Մոսկվայում տեղի է ունեցել «Հայֆիլմի» առաջին կինոնկարի՝ «Նամուս»-ի պրեմիերան։

1924 – ծնվել է ռեժիսոր Գրիգոր Մկրտչյանը։

1935 – ծնվել է ճանաչված դերասան Արմեն Ջիգարխանյանը։

1968 – վախճանվել է դերասան Արման Կոթիկյանը։

1980 – Ժնևյան հյուրանոցում ռումբի ժամանակից շուտ պայթելուց հետո ձերբակալվել են ԱՍԱԼԱ-ի անդամներ Ալիկ Ենիգոմիշյանը և Սյուզի Մահսերդջյանը։

1988 – Ստեփանակերտ են այցելել ԽՍՀՄ Գերագույն խորհրդի Ազգությունների խորհրդի անդամները և բանակցություններ վարել հայկական կողմի հետ, որոնք անարդյունք են եղել։

1994 – Հայաստանը դիվանագիտական հարաբերություններ է հաստատել Անգոլայի և Ղազախստանի հետ։

2007 – ՄԱԿ-ի Պարենի և գյուղատնտեսության կազմակերպությունը կոչ է արել Եվրամիությանը, Ռուսաստանին և Ուկրաինային հրատապ միջոցներ ձեռնարկել Հայաստանում և Վրաստանում խոզերի աֆրիկյան ժանտախտը կանխելու համար։
– Երևանում մեկնարկել է շախմատի մինչև 20 տարեկան տղաների և աղջիկների աշխարհի առաջնությունը, որին մասնակցել են 50 երկրների 150 ներկայացուցիչներ։

2011 – վախճանվել է ամերիկահայ դերասանուհի և երգչուհի Քեյ Արմենը։

2013 – Ազգային ժողովը ընդունել է Հայաստանի անկախության 22-ամյակի կապակցությամբ համաներում, որի արդյունքում մոտավորապես 500–600 մարդ ազատ է արձակվել, իսկ համաներումը տարածվել է մոտ 1300 մարդու վրա։

2016 – Վիգեն Սարգսյանը նշանակվել է պաշտպանության նախարար, իսկ Էդվարդ Նալբանդյանը՝ արտգործնախարար։

2019 – կառավարությունը հաստատել է երկրի հակակոռուպցիոն ռազմավարությունը։ Ստեղծվել է Հակակոռուպցիոն կոմիտե, որը միավորել է մի շարք քննչական վարչություններ և զբաղվելու է բացառապես կոռուպցիոն հանցագործություններով։

2020 – Ղարաբաղյան երկրորդ պատերազմի ժամանակ ադրբեջանական բանակը գրավել է Մատաղիս բնակավայրը։

2023 – Ստեփանակերտի օդանավակայանում տեղակայված ռուսական զորակայանում Ադրբեջանի հատուկ ծառայություններին են հանձնվել Արցախի Հանրապետության նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը և Արցախի Հանրապետության Ազգային ժողովի գործող նախագահ Դավիթ Իշխանյանը, որից հետո նրանց տեղափոխել են Բաքու։

ԱՇԽԱՐՀՈՒՄ

Մ.թ.ա. 42 – վախճանվել է հռոմեացի քաղաքական գործիչ, զորավար Կասիուս Լոնգինը, որը հանդիսացել է Կեսարի սպանողներից մեկը։

382 – հռոմեական կայսր Թեոդոս Ա-ն Ֆրակիայի հողերը տրամադրել է որպես վեստգոթերի վերաբնակեցման տարածք։

1670 – Սիմբիրսկում Յուրի Բարյատինսկու ղեկավարած Ռուսաստանի կառավարական ուժերը ջախջախել են Ստեփան Ռազինի բանակին։

1611 – վախճանվել է Իսպանիայի և Պորտուգալիայի թագուհի Մարգարիտա Ավստրիականը։

1866 – Վիեննական պայմանագրով Ավստրիան Իտալիային է տվել Վենետիկը։

1891 – Աբխազիայում տեղի է ունեցել ուժեղ երկրաշարժ, որի հետևանքով առաջացել է Ամտկել լիճը։

1226 – վախճանվել է իտալական սուրբ Ֆրանկիսկոս Ասիզցին։

1886 – ծնվել է ֆրանսիացի արձակագիր Ալեն-Ֆուրնիեն։

1895 – ծնվել է ռուս նշանավոր բանաստեղծ Սերգեյ Եսենինը։

1897 – ծնվել է ֆրանսիացի գրող և քաղաքական գործիչ Լուի Արագոնը։

1900 – ծնվել է ամերիկացի գրող Թոմաս Վուլֆը։

1919 – ծնվել է լիտվացի բանաստեղծ Էդուարդաս Մեժելայտիսը։

1929 – Խորվաթների, սերբերի և սլովենների թագավորությունը ստացել է Հարավսլավիա պաշտոնական անվանումը։

1932 – վախճանվել է գերմանացի աստղագետ Մաքսիմիլիան Ֆրանց Յոզեֆ Կորնելիուս Վոլֆը։

1941 – ամերիկյան քիմիկոսներ Լայլ Գուդհյուն և Ուիլյամ Սալլիվանը արտոնագրել են ինսեկտիցիդների ցրման աէրոզոլային կոնտեյները։

1952 – Լոս Անջելեսում իրականացվել է առաջին ձայնագրությունը մագնիսական ժապավենի վրա։

1952 – Մեծ Բրիտանիան առաջին անգամ փորձարկել է միջուկային զենք։ Բրիտանիան դարձել է երրորդ միջուկային տերությունը։

1986 – Սովետական К-219 ստրատեգիական նշանակության սուզանավը վթարվել է (հրթիռը պայթել է շախտայում), որի արդյունքում սուզանավը երեք օր անց խորտակվել է։

1990 – Գերմանիայի Ֆեդերատիվ Հանրապետությունը և Գերմանիայի Դեմոկրատական Հանրապետությունը միավորվել են և ստեղծվել է Գերմանիայի Հանրապետությունը։

1993 – Մոսկվայում նախագահ Ելցինի և Գերագույն խորհրդի հակամարտությունը վերածվել է զինված բախման։

1993 – Սոմալիի մայրաքաղաք Մոգադիշոյում քաղաքացիական պատերազմի ընթացքում սկսվել են մարտեր ՄԱԿ-ի խաղաղապահ ուժերի և սոմալիական զինված ուժերի միջև։

2003 – Տիբեթում առաջին անգամ անցկացվել է գեղեցկության մրցույթ։ Հաղթել է միակ մասնակիցը՝ 20-ամյա Ցերինգ Կինը և ստացել «Միսս Տիբեթ» կոչումը և 2000 դոլար պարգև։

2009 – ստեղծվել է Թյուրքական խորհուրդը։

Կ. Խաչիկյան