«Ծխեց, փախավ և մահացավ զուգարանում»
ՔԱՂԱՔԱԿԱՆՈՒԹՅՈՒՆ
Խորհրդավոր կերպով մահացել է 43-ամյա Բորիս Ավագյանը՝ Պետական գույքի կառավարման դաշնային գործակալության նախկին պաշտոնյան, գրում է bloknot.ru-ն։ Նա հետաքննության տակ էր միլիարդավոր ռուբլիների մաքսային տուրքերի հափշտակության խմբակային գործով։ Խորամանկ Ավագյանը, ով նաև հայկական անձնագիր ուներ, փորձել էր խուսափել դատավարությունից՝ զինվորագրվելով հատուկ նշանակության զորքերին, սակայն չէր գնացել ռազմաճակատ։ Վերջիվերջո, սեպտեմբերի 23-ին Ավագյանին ռազմական ոստիկանությունը, վերաբացելով նրա ծառայել չցանկանալու գործը, տարել էր Սանկտ Պետերբուրգի դատարան՝ հստակ կալանավորելու նպատակով։ Նա թույլտվություն էր խնդրել դուրս գալ ծխելու (!), նստել իրեն սպասող մեքենան և թռել դեպի Հայաստանի հյուպատոսություն, որտեղ թաքնվել էր դռների հետևում։ Ռուսաստանի անվտանգության ուժերը ստիպված էին մնալ աստիճանների վրա․ դիվանագիտական նորմերի համաձայն հայկական տարածք համարվող հյուպատոսություն ներխուժելը հավասարազոր է այդ երկրի վրա անմիջական հարձակման։
Ավագյանի խնդիրները ռուսական օրենսդրության հետ առաջացել են ավելի քան 4,2 միլիարդ ռուբլի մաքսային վճարումներից խուսափելու մեղադրանքներից հետո։ «Սխեմաների» վարպետ պաշտոնյան, ըստ քննիչների, արտասահմանից Ռուսաստան էր ներմուծել տարբեր սարքավորումներ՝ դրանք հայտարարագրելով էժան շինանյութեր։ Ավագյանը նախկինում տնային կալանքի տակ էր Ռուսաստանում, որտեղից փախել էր Ֆրանսիա։ Նա նաև հրաժարվել էր Ռուսաստանի քաղաքացիությունից՝ 2018 թվականին տեղափոխվելով աշխատանքի Լեռնային Ղարաբաղ, որը դեռևս չէր նվաճվել Ադրբեջանի կողմից։ 2021 թվականից Ավագյանը կրկին հայտնվել էր Ռուսաստանում։ Եվ այսպես, արդյունքում՝ «արագ փախուստ» դատարանից, Հայաստանի հյուպատոսարանում թաքնվել և խորհրդավոր մահ։ Նախնական տեղեկությունների համաձայն՝ Ավագյանը, ենթադրաբար, փակվելով զուգարանում ինքնասպան է եղել։
«Ողբերգական դեպք, ոչ ոք մեղավոր չէ»,– հեգնում են մեկնաբանները։ Հրապարակախոս Սերգեյ Կոլյասնիկովը կարծում է, որ Ավագյանի «կամավոր ինքնասպանությունը» հավանաբար կազմակերպված է եղել արտաքին օգնությամբ։ «Նրա մահը ծածկել է բոլոր անորոշությունները։ Չէ՞ որ հնարավոր է, որ նա հույս ուներ պաշտպանություն գտնել հյուպատոսարանում այն մարդկանցից մեկից, որոնց հետ «գործ էր անում»։ Նա օգնել է իր հայրենի Հայաստանից մեկին գողանալ 4,2 միլիարդ ռուբլի ռուսական հարկերից և մտածել է, որ իր հետ լավ կվարվեն ու կպաշտպանեն։ Դե, նրանք էլ ծածկել են նրան՝ սավանով։ Ըստ էության, Հայաստանի քաղաքացի սպանվել է Հայաստանի հյուպատոսարանում։ Հզոր է։ Եթե նա մնար Ռուսաստանում, ավելի երկար կապրեր»,– ասել է Կոլյասնիկովը։
Ամփոփելով ասենք՝ պարզ է, որ սա մութ գործ է։ Ինքնասպանություն գործելու համար պարտադիր չէր հասնել Հայաստանի հյուպատոսարան։ Մահից որոշ ժամանակ առաջ Ավագյանը իր սոցիալական ցանցի էջում լուսանկար էր հրապարակել մի գեղեցիկ կնոջ (հավանաբար իր կնոջ) հետ՝ կից մակագրությամբ․ «Ազատ և անպարտելի։ Ինչպես միշտ»։ Ի վերջո, Ավագյանը ո՛չ ազատություն, ո՛չ էլ հաղթանակ գտավ Հայաստանի հյուպատոսարանում։
Նյութը հրապարակման պատրաստեց Կամո Խաչիկյանը
