ՄԱԿ-ը կոչ է անում Սիրիայի իշխանություններին պատասխանատվության ենթարկել Սուվեյդայում տեղի ունեցած սպանությունների մեղավորներին

ՄԱԿ-ի Մարդու իրավունքների գերագույն հանձնակատարը կոչ է անում Սիրիայի ժամանակավոր իշխանություններին պատասխանատվության ենթարկել Սուվեյդա քաղաքում տեղի ունեցած սպանությունների մեղավորներին:

ՄԱԿ-ի Մարդու իրավունքների գերագույն հանձնակատարի գրասենյակի պաշտոնական հայտարարության մեջ նշվում է, որ Սիրիայի ժամանակավոր իշխանությունները պետք է ապահովեն պատասխանատվության ենթարկում և արդարադատության իրականացում Սիրիայի հարավում գտնվող Սուվեյդա քաղաքում տեղի ունեցած սպանությունների և մարդու իրավունքների այլ կոպիտ խախտումների համար։

Հաղորդվում է, որ հուլիսի 12-ից սկսած՝ Սուվեյդայում սպանվել են հարյուրավոր մարդիկ։ Գերագույն հանձնակատարի գրասենյակը նաև մտահոգություն է հայտնել Իսրայելի օդային հարվածների հետևանքով Սուվեյդայում, Դարաայում և Դամասկոսի կենտրոնում խաղաղ բնակչության շրջանում զոհերի մասին հաղորդագրությունների կապակցությամբ։

ՄԱԿ-ի Մարդու իրավունքների գերագույն հանձնակատար Ֆոլքեր Թյուրքը կոչ է արել անցկացնել մանրակրկիտ, շտապ և անկախ քննություն՝ երաշխավորելու, որ մարդու իրավունքների խախտումների համար պատասխանատու անձինք չներգրավվեն Սիրիայի պաշտոնական անվտանգության կամ ռազմական կառույցներում։

Հիշեցնենք, որ հուլիսի 13-ին հայտնի դարձավ, որ զինված խմբավորումները հարձակվել են Սուվեյդա նահանգի մի շարք դրուզական բնակավայրերի վրա, ինչի հետևանքով փակվել է նահանգը Դամասկոսի հետ կապող ճանապարհը։ Քաղաքացիական բնակչության պաշտպանության համար դրուզական ինքնապաշտպանական ջոկատները դիմակայել են զինված խմբավորումներին։ Սիրիայի պաշտպանության նախարարության տվյալներով՝ բախումների ընթացքում զոհվել է ավելի քան 30 մարդ, ավելի քան 100-ը վիրավորվել են, ինչպես նաև հայտարարվել է Սիրիայի անցումային կառավարության ուժերի 20 զինծառայողի մահվան մասին։

Չորեքշաբթի օրը Իսրայելի ռազմաօդային ուժերը հարվածներ են հասցրել Դամասկոսի գլխավոր շտաբին և նախագահական պալատին՝ դրուզական համայնքի պաշտպանությունը ապահովելու նպատակով, չնայած Սիրիայի իշխանությունների հայտարարությանը, որ Իսրայելին նախազգուշացրել են Սուվեյդա զորքեր մտցնելու մասին՝ միջկլանային զինված բախումներին վերջ տալու համար։ «Ալ-Ջազիրա» հեռուստաալիքին հայտնել է, որ բոլոր ապօրինի զինված խմբավորումները լքել են Սուվեյդա քաղաքը։