«Քաղաքագետ Սոլոննիկով. իշխանափոխությունը Հայաստանում հնարավոր է ընտրություններից առաջ»
ՔԱՂԱՔԱԿԱՆՈՒԹՅՈՒՆ
ՀՀ վարչապետ Նիկոլ Փաշինյանի կողմից քաղաքական դաշտը մաքրելու փորձը կարող է հանգեցնել ընդդիմության համախմբման և իշխանափոխության, rt.com-ին ասել է Ժամանակակից պետության զարգացման ինստիտուտի տնօրեն Դմիտրի Սոլոննիկովը։
«Իրավիճակը Հայաստանում զարգանում է լարվածության սրման սցենարով։ Դրանից կա երկու ելք։ Առաջին սցենարն ընդդիմության ակտիվ ներկայացուցիչների, նրանց աջակցող ֆինանսական կառույցների և հոգևոր առաջնորդների՝ ի դեմս եկեղեցու ներկայացուցիչների, քաղաքական տարածքից հեռացումն է», - նշել է նա։ Դա այն սցենարն է, որը Նիկոլ Փաշինյանը տրամաբանական է համարում իր համար և որի համար սկսել է գործել իր հակառակորդների դեմ, շարունակել է քաղաքագետը։
«Նա որոշակի ցնցումներ կզգա մի քանի ամսվա ընթացքում։ Սակայն ընտրություններից 6-9 ամիս առաջ ամեն ինչ կհանդարտվի, ընթացիկ իրադարձությունները կվերանան օրակարգից։ Եվ Փաշինյանը 2026 թվականի հունիսին նոր ալիքով կգնա ընտրությունների՝ զրկելով ընդդիմությանն իրեն ակտիվորեն հակադրվելու հնարավորությունից։ Նա միայնակ կմնա դաշտում», - ասել է փորձագետը։
Սոլոննիկովը հավելել է, որ ներկայումս իրականացվող սցենարը, ամենայն հավանականությամբ, Փաշինյանի համար մշակվել է արևմտյան քաղաքական ռազմավարների կողմից։ Սակայն, քաղաքագետի կարծիքով, Հայաստանում իրադարձությունների զարգացման երկրորդ սցենար ևս կա։ «Նա (Փաշինյանը) չափազանց հեռուն է գնացել Հայ եկեղեցու վրա իր հարձակումներով՝ հնագույն եկեղեցու, մարդկության պատմության մեծագույն եկեղեցիներից մեկի։ Եվ դա իսկապես կարող է լուրջ բողոքի ալիք առաջացնել», - կարծիք է հայտնել մասնագետը։
Սոլոննիկովը նշել է, որ Փաշինյանը միաժամանակ է հարվածում հայ հասարակության հոգևոր սկզբունքներին և հարձակվում ընդդիմության վրա։ «Եվ դա ընդդիմության միավորման պատճառ է, և բոլորի` աջից մինչև ձախ։ Դա անձնական գոյատևման հարց է։ Եթե նրանց հաջողվի միավորվել և ստեղծել միասնական ճակատ, ապա իշխանափոխությունը կարող է տեղի ունենալ 2026 թվականի հունիսից էլ շուտ», - եզրափակել է նա։
Նյութը հրապարակման պատրաստեց Կամո Խաչիկյանը
