Փաշինյանի մանր վրեժը Սեյրան Օհանյանից

Գլխավոր դատախազը դիմել է Ազգային ժողովին՝ ընդդիմադիր «Հայաստան» խմբակցության ղեկավար Սեյրան Օհանյանի ու նույն խմբակցության պատգամավոր Արծվիկ Մինասյանի նկատմամբ քրեական հետապնդում հարուցելու թույլտվություն ստանալու համար: Գլխավոր դատախազը երկու առանձին ծավալուն միջնորդություններում պնդում է, որ Սեյրան Օհանյանը պաշտպանության նախարարի պաշտոնը զբաղեցնելու տարիներին զավթել է Գեղարքունիքի մարզի Դրախտիկ համայնքում՝ Սևան ազգային պարկի տարածքում գտնվող պետական հողատարածքը և առանց կառուցապատման իրավունքի դրա վրա առանձնատուն կառուցել, ապա հայտարարագրում թաքցրել այդ սեփականությունը:

Երկրորդ միջնորդությունում նշվում է, որ Արծվիկ Մինասյանը, լինելով բնապահպանության նախարար, չի կատարել ծառայողական պարտականությունները, թաքցրել է Սեյրան Օհանյանին վերագրվող ենթադրյալ ապօրինությունները՝ դրանով պետությանն էական վնաս պատճառելով: Դատախազի դիմումում կալանքի միջնորդություն չկա, միջնորդագրերը կքննարկվեն առաջիկա քառօրյային, որը մեկնարկում է հունիսի 17-ին։

Ուղիղ մեկ ամիս առաջ՝ Կառավարություն-Ազգային ժողովի հարցուպատասխանին միջադեպ էր գրանցվել վարչապետի և ընդդիմադիր «Հայաստան» խմբակցության պատգամավորների միջև։ Նիկոլ Փաշինյանն ընդդիմադիրներին «համբալ» էր անվանել, նաև կոնկրետ Օհանյանին դիմելով զգուշացրել էր. «նրան ուղարկել ԱԱԾ պադվալ»։

Ըստ երևույթին, խորհրդարանում իր նվաստացման համար Փաշինյանը որոշել է էժանագին վրեժ լուծել ընդդիմադիր պատգամավորներից, դատախազին էլ հանձնարարել է հերթական սուտ գործը կարել։ Բնականաբար, այս գործն էլ, ինչպես վարչախմբի հարուցած ցանկացած այլ գործ, տապալվելու է դատարաններում, բայց նստվածքը շարունակելու է մնալ, իսկ Փաշինյանի՝ էժանագին գործչի համբավն ամրապնդվելու է։ 

Մարգարիտա Մարտիրոսյան