Նիկոլ Փաշինյանը քրեական գործերով նոր շոուներ է բեմադրում

Վերջին օրերին հարուցված քրեական գործերը և դրանց վերաբերյալ տարածված տեղեկությունները վկայում են, որ գործող իշխանությունները խորհրդարանական ընտրություններից առաջ նոր շոուներ են բեմադրում՝ փորձելով վարկաբեկել նախկին իշխանություններին, ինչպես նաև հանրության մոտ տպավորություն ստեղծել, թե իրենք պայքարում են օրենքի գերակայության համար։ Մասնավորապես, օրերս հայտնի դարձավ, որ կառավարության և Ազգային ժողովի վարչական շենքերում, նաև այլ վայրերում զանգվածային անկարգություններ կազմակերպելու, դրանց մասնակցելու համար ևս 9 անձ է ձերբակալվել։ Խոսքը 2020 թվականի նոյեմբերի 9-ի գիշերվա դեպքերի մասին է։ Մի քանիսն արդեն ձերբակալվել և դատապարտվել էին, բայց իրավապահները հայտարարում են, թե նոր մարդկանց են կարողացել հայտնաբերել և նրանց կալանավորելու միջնորդություն ներկայացրել։ Այս կերպ փաշինյանական իշխանությունը կրկին փորձում է օգտագործել նոյեմբերի 9-ի դեպքերը՝ քրեական վարույթներ հարուցելու, ընդդիմադիրներին մեկուսացնելու համար։

Ամենազավեշտալին 3-րդ նախագահ Սերժ Սարգսյանի դեմ հարուցված նոր քրեական մեղադրանքն է։ Ըստ Հակակոռուպցիոն կոմիտեի, նախկին նախագահը մեղադրվում է 2008 թ․-ին նախագահի պաշտոնը զբաղեցնելու ժամանակ մոտ 3 միլիոն դոլար կաշառք ստանալու մեջ։

Ըստ հաղորդագրության, Սերժ Սարգսյանը կաշառքի դիմաց աջակցել է մի գործարարի ընկերության բաժնեմասը արտասահմանյան ընկերության վաճառքի գործարքի անցկացմանը, կաշառքի հիմնական մասն էլ Սարգսյանն իբր ստացել է կանխիկ, մնացածը փոխանցվել է փոխկապակցված անձի հաշվին որպես բարեգործություն։

3-րդ նախագահի թիմում վստահ են, որ այս մեղադրանքը փլուզվելու է ինչպես բոլոր նախկին մեղադրանքները։ Բայց գործող իշխանությունները սրանով ընդամենը փորձում են այսրոպեական խնդիր լուծել և, բոլորովին հաշվի չառնելով, որ նման մեղադրանքները լրջորեն ազդում են երկրի հեղինակության և վարքի վրա, փորձում են նախկին նախագահների հաշվին քաղաքական դիվիդենտներ շահել և իրենց էլ ներկայացնել որպես արդարության մարտիկներ։ 

Բելլա Պողոսյան