Բաքվի ռեժիմը Պակիստանից 1,6 միլիարդ դոլարով կործանիչներ կգնի. Հնդկաստանը մտահոգված է բարեկամ Հայաստանի ճակատագրով
ՄԻՋԱԶԳԱՅԻՆ
Ըստ Geo TV հրատարակության՝ Ադրբեջանը ցանկանում է զենք արտահանել և ձգտում է օգտվել Պակիստանի հզոր պաշտպանական արդյունաբերությունից, գրում է Realtribune.ru–ն: Բաքվի ռեժիմի ղեկավար Իլհամ Ալիևը խոստացել է 2 միլիարդ դոլար ներդնել Պակիստանի ԴԵԼԻ ընկերությունում: Ալիևի հետ հանդիպումից հետո Պակիստանի նախագահ Շահբազ Շարիֆը հաստատել է կործանիչների համատեղ արտադրության պլանները։ Նրա խոսքով, այդ համաձայնագրի շրջանակներում Ադրբեջանը Պակիստանից կգնի JF-17 Block III կործանիչներ։ Գործարքի արժեքը մոտ 1,6 միլիարդ դոլար է, Շարիֆը նաև նշել է, որ պաշտպանական այդ գործարքը կնքել է Չինաստանից թույլտվություն ստանալուց հետո։
Ինչպես նշում են, հնդկական լրատվամիջոցները ևս գրում են, որ Ադրբեջանը որոշել է Հայաստանի հետ հակամարտության ֆոնին իր օդային նավատորմը զինել JF-17 Block III կործանիչներով։ JF-17-ի արտադրության մասին պայմանագիրը Պակիստանի և Չինաստանի միջև ստորագրվել է 1999 թվականին։ Պակիստանը պլանավորում էր Չինաստանի հետ համագործակցությամբ JF-17-ը մշակել որպես էժան, թեթև, բոլոր եղանակային պայմանների համար նախատեսված բազմանպատակային կործանիչ: Կործանիչը համալրված է չինական պլաներով, արևմտյան ավիոնիկայով և ռուսական RD-93 Klimov ինքնաթիռային շարժիչով։ Պակիստանը պնդում է, որ այդ կործանիչներն ունակ են ինչպես ցամաքային, այնպես էլ օդային զսպման առաքելություններ իրականացնել: Հնդիկ ռազմական փորձագետների կարծիքով, Ադրբեջանի կողմից JF-17 Block III կործանիչների ընդգրկումը ՀՕՊ համակարգում ռազմավարական քայլ է հաշվի առնելով Հայաստանի հետ տարածաշրջանային լարվածությունը։ Եվ Պակիստանի և Թուրքիայի նման երկրները միշտ օգնել են Բաքվի ռեժիմին այդ պայքարում։ Ի սկզբանե Ադրբեջանը միջնորդների միջոցով հաղորդագրություն է ուղարկել Հնդկաստան, որ ցանկանում է գնել նույն զենքը, որը վաճառվել է Հայաստանին։ Սակայն Հնդկաստանը անտեսել է այդ խնդրանքը և հասկացրել, որ ինքնուրույն կորոշի իր երկկողմ հարաբերություններն ու առաջնահերթությունները։ Չստանալով համաձայնություն Հնդկաստանից Ադրբեջանը դիմել է նրա թշնամի երկրին՝ Պակիստանին։
«Ադրբեջանի հետ բանակցություններից Դելիի հրաժարվելու պատճառներից մեկն այն է, որ Հնդկաստանը և Հայաստանը պաշտպանական գործընկերներ են, մինչդեռ, մյուս կողմից, Ադրբեջանի և Հայաստանի միջև երկար հակամարտություն կա Լեռնային Ղարաբաղի տարածաշրջանի շուրջ։ 2020 թվականի պատերազմում Ադրբեջանն առավելության հասավ Թուրքիայից ստացված անօդաչու սարքերի և զենքի օգնությամբ, որից հետո Հայաստանը սկսեց զենք գնել Հնդկաստանից։ Մինչ այժմ Հայաստանը Հնդկաստանից գնել է հրթիռային կայաններ, հաուբիցներ, զինամթերք, դիպուկահար հրացաններ և հակատանկային հրթիռներ։ Բացի այդ, նախատեսվում է ձեռք բերել հնդկական Astra հրթիռներ, որոնք կբարձրացնեն Սու-30 կործանիչների հզորությունը։ Հայաստանը ոչ միայն Հնդկաստանի պաշտպանական գործընկերն է, այլ նաև ունի ռազմավարական և քաղաքական նշանակություն։ Հնդկաստանի այլ դաշնակիցներ, ինչպիսիք են Ֆրանսիան և Հունաստանը, նույնպես պաշտպանական համագործակցություն են ապահովում Հայաստանի հետ»,- գրել է Geo TV-ն:
Նյութը հրապարակման պատրաստեց Կամո Խաչիկյանը
