Պատգամավոր Չեմերիս. Հայաստանի անդամակցությունը ԵՄ-ին վտանգ է ներկայացնում երկրի համար
ՔԱՂԱՔԱԿԱՆՈՒԹՅՈՒՆ
Եվրամիությանը Հայաստանի անդամակցության գործընթացն իրական հեռանկար չունի և կարող է լուրջ վտանգներ ներկայացնել երկրի համար, ՌԻԱ Նովոստիին ասել է Պետդումայի պատգամավոր Ռոզա Չեմերիսը, գրում է sila-rf.ru–ն։ Հիշեցնենք, որ Հայաստանի խորհրդարանն ընդունել է արևմտամետ ուժերի նախաձեռնած օրինագիծը ԵՄ-ին միանալու գործընթաց սկսելու համար, չնայած այն հանգամանքին, որ դաշինքն ինքը Հայաստանին անդամակցություն չի առաջարկել։
Չեմերիսն ընդգծել է, որ այդ գործընթացն ապագա չի խոստանում և կարող է հանգեցնել զգալի տնտեսական կորուստների։ Նա բացատրել է, որ Հայաստանն արդեն ԵԱՏՄ-ի և ՀԱՊԿ-ի անդամ է, և եթե շարունակի ԵՄ-ին անդամակցելու իր ուղին, երկիրը ստիպված կլինի ընտրություն կատարել այդ տարբեր ասոցիացիաների միջև։ Պատգամավորի խոսքով անհնար է միաժամանակ մաս կազմել անհամատեղելի միջազգային կառույցներին:
Բացի այդ, Չեմերիսը կասկած է հայտնել անվտանգության երաշխիքների վերաբերյալ, որոնք Հայաստանը կկարողանա ստանալ Եվրամիությունից։ Նա նշել է, որ արդյունքում երկիրը կարող է հայտնվել ոչ թե ԵՄ-ի, այլ, ավելի հավանական է, Թուրքիայի պաշտպանության տակ, ինչը պոտենցիալ հղի է աշխարհաքաղաքական լուրջ հետևանքներով։
Օրինագծի նախաձեռնողի ներկայացուցիչ Արտակ Զեյնալյանը զեկուցել էր, որ փաստաթուղթը չի նախատեսում ԵՄ-ին Հայաստանի անդամակցության հանրաքվեի անցկացում, այլ ընդամենը գործընթացի սկիզբն է։ Նա նաև խոստովանել էր, որ ԵՄ թեկնածու երկրներից և ոչ մեկը նախկինում նման օրինագծեր չի ընդունել:
Ընդդիմադիր «Պատիվ ունեմ» խմբակցությունն առաջարկվող օրենքը որակել է իրավաբանորեն անհեթեթ նշելով, որ դա ընդամենը հռչակագիր է և կարող է սպառնալ Հայաստանի տնտեսության համար կենսական նշանակություն ունեցող ԵԱՏՄ շուկաներում ազատ առևտրին։
ՌԴ փոխվարչապետ Ալեքսեյ Օվերչուկն ավելի վաղ հայտարարել էր, որ Ռուսաստանը Հայաստանում Եվրամիությանն անդամակցելու մասին օրինագծի քննարկումը դիտարկում է որպես ԵԱՏՄ-ից Երևանի դուրս գալու գործընթացի մեկնարկի ազդանշան և կկարգավորի իր տնտեսական քաղաքականությունը Հայաստանի նկատմամբ հաշվի առնելով այդ իրավիճակը։
Ընդդիմության ներկայացուցիչները նաև մատնանշել են նախագծում առկա սահմանադրական հակասությունը՝ նշելով, որ «Ժողովրդի կամքն արտահայտող Հայաստանի Հանրապետություն» արտահայտությունը չի կարող օգտագործվել առանց քաղաքացիների իրական կամքը հաստատող հանրաքվե անցկացնելու:
Նյութը հրապարակման պատրաստեց Կամո Խաչիկյանը
