Իշխանությունը դժկամությամբ է արձագանքում ԶՊՄԿ-ում ստեղծված իրավիճակին
ՎԵՐԼՈՒԾՈՒԹՅՈՒՆՆԵՐ
Զանգեզուրի պղնձամոլիբդենային կոմբինատի ներկայացրած հանցագործության մասին հաղորդումների հիման վրա Քննչական կոմիտեում ինքնիրավչության հոդվածով վարույթ է նախաձեռնվել։ Շուրջ 12 օր կոմբինատի աշխատանքները կազմալուծվել են մի փոքր խումբ անձանց ապօրինի գործողությունների հետևանքով։ Պարզ են ապօրինի ակցիաների կազմակերպիչները, բայց դեռ մեղադրյալի կարգավիճակ ունեցող անձ չկա:
ԶՊՄԿ-ն նախօրեին հայտարարությունն էր տարածել, նշել, որ ընկերության հետ չառնչվող անձինք, հրապարակայնորեն և ուղղակի սպառնալիքներով կոչ են անում աշխատակիցներին չգնալ աշխատանքի և խոչընդոտել ընկերության գործունեությունը։ «Մենք սա համարում ենք անընդունելի և ակնկալում ենք իրավապահ մարմիններից այս փաստերի մանրամասն ու համապարփակ քննություն։ Արտաքին սադրիչների մասնակցությունը խանգարում է ընկերության ղեկավարության և կոլեկտիվի միջև կառուցողական աշխատանքային մթնոլորտին»,- ասվում է ընկերության տարածած հայտարարությունում։
Կոմբինատի բավական խիստ հայտարարությունից հետո միայն Քննչական կոմիտեն բարեհաճեց քրգործ հարուցել, մինչդեռ կոմբինատի 25 տոկոսի սեփականատեր պետությունը հենց առաջին օրվանից պետք է արձագանքած լիներ։
«ԶՊՄԿ» ՓԲԸ գլխավոր տնօրեն Ռոման Խուդոլին երեկ տված հարցազրույցում նշում է, թե ժամանակին պատահական ոչ ոք չէր կարող կոմբինատից շահ ստանալ, ԶՊՄԿ-ն պետություն էր պետության մեջ, իսկ կոմբինատի ռեսուրսներն օգտագործվում էին որոշակի խմբակների շահերի սպասարկման համար։ Այսօր գողությունները վերացվել են, ամեն բան արվել է կոմբինատն ի շահ ժողովրդի և պետության ծառայեցնելու համար։ Կոմբինատը թիվ մեկ հարկատուն է, ՀՀ տնտեսության ողնաշարը, և դրա դեմ գործողությունները գործողություններ են ընդդեմ Հայաստանի։
Դիանա Սահակյան
