Հնդկաստանի ՊՆ-ն չեղարկել է պայմանագիրը

Հնդկաստանի պաշտպանության նախարարությունը չեղյալ է հայտարարել 400 անօդաչու թռչող սարքերի մատակարարման երեք պայմանագիր՝ ԱԹՍ-ներում չինական արտադրության մասերի օգտագործման պատճառով: Այս մասին հայտնում է Times of India թերթը՝ վկայակոչելով գերատեսչության իր աղբյուրներին։

Ինչպես նշում է լրատվամիջոցը, միջին բարձրության 200, 100 ծանր և 100 թեթև լոգիստիկ դրոնների մատակարարման՝ չեղարկված պայմանագրերի ընդհանուր արժեքը կազմում է ավելի քան 2,3 մլրդ ռուփի (26,3 մլն դոլար). պայմանագրերն ստորագրվել են 2023 թվականին բանակի արտակարգ գնումների դրույթների շրջանակներում՝ Չեննայում տեղակայված ընկերության հետ: ԱԹՍ-ները, առաջին հերթին, նախատեսված էին տեղակայել Չինաստանի հետ փաստացի վերահսկողության 3488 կիլոմետրանոց գծի երկայնքով:

«Ցավոք, զինված ուժերի համար արտադրվող անօդաչու թռչող սարքերում որոշ հնդկական ընկերություններ օգտագործում են չինական բաղադրիչներ և էլեկտրոնիկա։ Դա կիբեռանվտանգության լուրջ սպառնալիք է՝ տվյալների անվտանգության և գործողությունների խախտման հնարավորությամբ։ Հակառակորդը կարող է ստանալ անօդաչու թռչող սարքի վերահսկողությունը և խլացնել այն: Էլեկտրոնիկայում կարող է լինել անվերահսկելի մաս, որով շրջանցվում են անվտանգության միջոցառումները», - պարզաբանել է թերթի աղբյուրը։

Լրատվամիջոցի տվյալներով՝ ԱԹՍ-ների նկատմամբ պահանջները խստացվել են այն բանից հետո, երբ Չինաստանի և Պակիստանի հետ սահմանների երկայնքով հետախուզական ու դիտորդական առաքելությունների ժամանակ Հնդկաստանի բանակը բախվել է անօդաչուների աշխատանքի մի շարք խափանումների:

Հնդկաստանի և Չինաստանի միջև հյուսիսարևելյան Արունաչալ Պրադեշ նահանգում գրեթե 60 հազար քառակուսի կիլոմետր պատկանելության, ինչպես նաև Քաշմիրի հյուսիսային լեռնային տարածքի մի հատվածի վերաբերյալ առկա է երկարամյա տարածքային վեճ: Փաստացի վերահսկողության գիծը, որն այս տարածաշրջանում փոխարինում է երկրների միջև սահմանը, անցնում է Լադակհ բարձրալեռ սահմանային տեղամասում:

Լադակհում փաստացի վերահսկողության գծի երկայնքով պարեկության կարգի վերաբերյալ 2024 թվականի հոկտեմբերի վերջին Նյու Դելին և Պեկինը պայմանավորվածություն են ձեռք բերել։ Հնդկական Ani գործակալությունը, հղում անելով պաշտոնական ռազմական աղբյուրներին, ավելի ուշ հայտնել է, որ Հնդկաստանն ու Չինաստանն ավարտել են այդ տարածաշրջանում զորքերի տեղակայումը: