Ռուսաստանից Հայաստան զբոսաշրջային հոսքն իջնում է բավականին բարձր գների պատճառով
ՏՆՏԵՍՈՒԹՅՈՒՆ
Հայկական դրամի փոխարժեքը ռուբլու նկատմամբ տարեսկզբից ամրապնդվել է գրեթե 15 %-ով, Հայաստանում հանգիստը թանկացել է մոտավորապես նույնքանով, և մոտավորապես նույնքանով էլ ռուսաստանցիների Հայաստան հանգստանալու մեկնելու ցանկությունն է անկում ապրել նման բարձր գների պատճառով, արձանագրել են akcent.site-ի փորձագետները:
Այս տարվա սեպտեմբերին Հայաստան է այցելել գրեթե 30 հազարով ավելի քիչ զբոսաշրջիկ, քան նախորդ տարվա նույն ամսին։ Զբոսաշրջության կոմիտեի տվյալներով այս ամիս երկիր է մուտք գործել 237 հազար զբոսաշրջիկ, մինչդեռ 2022 թվականի սեպտեմբերին այցելուների թիվը գերազանցել էր 260 հազարը։ Ամենաշատ զբոսաշրջիկներ եղել են Ռուսաստանից (ընդհանուրի 43 %-ը), Վրաստանից (12 %) և Իրանից (8 %)։ Սակայն, չնայած ռուս զբոսաշրջիկների զգալի ներկայությանը, նրանց թիվը 2023 թվականի սկզբից սկսել է նվազել։
Հայաստանում զբոսաշրջային ծառայությունների բարձր գները միակ բացասական գործոնը չեն։ Ռուսաստանի քաղաքացիների համար զբոսաշրջային փաթեթների արժեքը նույնպես զգալիորեն աճել է Ռուսաստանում գների ընդհանուր աճի պատճառով։
Բացի այդ, զբոսաշրջային հոսքի կրճատումը պայմանավորված է զբոսաշրջային ոլորտը խթանելու Հայաստանի անբավարար ակտիվությամբ։ Մասնավորապես, Հայաստանը երկրորդ տարին անընդմեջ չի մասնակցում Մոսկվայում անցկացվող MITT միջազգային զբոսաշրջային ցուցահանդեսին։ Դա շատ տարօրինակ է, եթե հաշվի առնենք այն, որ Հայաստանի համար Ռուսաստանը զբոսաշրջության առաջնահերթ շուկան է։ Հայաստանի իշխանությունները մոսկովյան ցուցահանդեսին մասնակցելուց հրաժարվելը բացատրում են նրանով, որ իրենց բոլոր ջանքերն ուղղված են եղել մեկ այլ զբոսաշրջային ֆորումի՝ Գերմանիայի ITB-ին։ Ըստ ամենայնի, նրանք ցանկանում են Հայաստան գրավել եվրոպացի զբոսաշրջիկներին։ Իսկ ռուսները, կարծում են, որ ամեն դեպքում կգան։ Բայց, ինչպես ցույց է տալիս վիճակագրությունը, ռուսներ արդեն քիչ են գալիս։
Նյութը հրապարակման պատրաստեց Կամո Խաչիկյանը
