Արտակարգ դեպք՝ Երևանում. հաստաբուն ծառն արմատից տապալվել ու ընկել է «BMW X3»-ի ու «Nissan»-ի վրա

Այսօր՝ հոկտեմբերի 17-ին, արտակարգ դեպք է տեղի ունեցել Երևանում: Ժամը 14:00-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Բայրոնի 4 շենքի մոտ հաստաբուն ծառը արմատից պոկվել ու ընկել է ավտոմեքենաների վրա:  

Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ՀՀ ՆԳՆ ՓԾ հատուկ նշանակության փրկարարական աշխատանքների իրականացման կենտրոնի խումբը:Ժամանել են նաև ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի պարեկները՝ վաշտի հրամանատար Արման Մարտիրոսյանի գլխավորությամբ:  

Պարեկները սահմանազատել են տարածքը և օպերատիվորեն ժամանած Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի կենտրոնի աշխատակիցները ժամանել են և բենզինային սղոցով ծառը հեռացրել են ավտոմեքենաների վրայից:

 Ըստ նախնական տեղեկությունների՝ բարեբախտաբար տուժածներ չկան:  Դեպքի վայր է ժամանել նաև ոստիկանության Կենտրոնական բաժնի հերթապահ խումբը՝ համայնքային ոստիկանության բաժանումունքի տեսուչի գլխավորությամբ:  Այս պահին տեսուչը արձանագրում և բացատրություն է վերցնում վնասված «BMW X3»-ի և «Nissan»-ի վարոդներից:  

Դեպքի փաստով ոստիկանության կենտրոնական բաժնում փաստաթղթեր են ձևակերպվում:Թե ով է արդյոք փոխհատուցելու քաղաքացիների կրած վնասը՝ հայտնի չէ, քաղաքացիներն էլ նշում էին, որ նշված ծառը հեռացնելու համար բազմաթիվ անգամ ահազանգել են Երևանի քաղաքապետարանի թեժ գիծ, Կենտոնի թաղապետարան, սակայն ոչ մի օգուտ:  

Բնակիչներն ասում էին, որ եթե ժամանակին ծառը հեռացվեր, որը ամբողջությամբ փտած էր, այսօր այս դեպքը չէր լինի:Երջանիկ պաատահականություն է, որ տապալման ժամանակ հետիոտներ անցնելիս չեն եղել: