Իրականացվել են հնդկական Zorawar թեթև տանկի փորձարկումներն անապատում. «Ցուցադրել է պահանջվող ճշգրտությունը»
ՄԻՋԱԶԳԱՅԻՆ
Սեպտեմբերի 13-ին հնդկական DRDO կազմակերպությունը («Ռոստեկ»-ի կոպիտ անալոգը) հայտարարել է Zorawar թեթև տանկի դաշտային փորձարկումների առաջին փուլի հաջող ավարտի մասին ցուցադրելով համապատասխան կադրեր, գրում է topwar.ru-ն:
«Դաշտային փորձարկման առաջին փուլը հաջողությամբ ավարտվել է: Տանկը նպատակներին հասել է անապատային տարածքներում և ցուցադրել անհրաժեշտ ճշգրտություն նախատեսված թիրախների ուղղությամբ կրակելիս»,- հայտարարել է DRDO-ն։
Մեր կողմից նշենք, որ Zorawar-ը ստեղծվել է հիմնականում Տիբեթի լեռնաշխարհում օգտագործելու համար։ Հետևաբար, ամենակարևորն այն է, թե ինչպե՞ս է մեքենան գործում այդ կոնկրետ տարածքում, այլ ոչ թե անապատում: Դեռ 2022 թվականի սեպտեմբերին էր հնդկական Larsen & Toubro ընկերությունն ընտրվել որպես «լեռնային տանկի» մշակման կապալառու։ Ընդհանուր առմամբ, հնդկական բանակը նախատեսում է գնել մինչև 700 միավոր Zorawar թեթև տանկ:
Մոտ 25 տոննա քաշով այդ տանկը նախագծված է այնպես, որ իր մանևրելու և փոխադրելիության շնորհիվ կարողանա արագ տեղակայվել բարձր լեռնային շրջանների վտանգված տարածքներում։ Տանկը համալրված է Cockerill 3105 աշտարակով և զինված է 105 մմ-ոց թնդանոթով։
Ինչպես նշել է հնդկական հրամանատարությունը, նման մեքենայի անհրաժեշտությունն ակնհայտ էր դարձել 2020-2022 թվականներին Չինաստանի հետ սահմանային բախումների ժամանակ, երբ Լադախի շրջանում ծայրահեղ բարձրությունը դժվարացրել էր այնպիսի ավելի ծանր տանկների շահագործումը, ինչպիսիք են T-72/90-ը և Arjun Mk1-ը, քանի որ նման մեքենաները նախատեսված չեն նման ծանր պայմանների համար։
Նյութը հրապարակման պատրաստեց Կամո Խաչիկյանը
