Ադրբեջանում դավաճանության մեղադրանքով խաղաղապահ գիտնական է ձերբակալվել. նա նամակագրություն է ունեցել հայերի հետ
ՄԻՋԱԶԳԱՅԻՆ
Հայաստանի հետ խաղաղության կողմնակից հայտնի ադրբեջանցի գիտնական է Ադրբեջանում ձերբակալվել պետական դավաճանության մեղադրանքով։ Փորձագետները նշում են, որ այժմ երկրում Իլհամ Ալիևի կառավարման ողջ ընթացքի ամենաաննախադեպ բռնաճնշումներն են, գրում է bbc.com-ը։
Պրահայի Չարլզի համալսարանի դոկտորանտ, քաղաքական հետազոտող Բահրուզ Սամեդովը քչերից մեկն է Ադրբեջանի կառավարության այն հայտնի հասարակական քննադատներից, ով եղել է Ադրբեջանում և ազատության մեջ: Այդպես էր մինչև վերջերս։ Ընկերները չեն կարողացել կապ հաստատել Բահրուզի հետ, իսկ առավոտյան հարազատներից իմացել են, որ նրա տատիկի բնակարանում, որտեղ նա ապրում էր, խուզարկություն է կատարվել, և նա ձերբակալվել է։ Իշխանությունները դեռ չեն մեկնաբանել կամ հաստատել գիտնականի ձերբակալությունը։ Նրա ընկերներից մեկը վրացական OC-Media հրատարակությանը պատմել է, որ Բահրուզն ակնկալում էր ձերբակալություն և հաճախ կատակում, որ իրեն բանտարկելու են դավաճանության համար։ Ինչպես Turan գործակալությանը հայտնել է նրա տատիկը՝ Զիբեյդան, ձերբակալությունից և խուզարկությունից հետո իրեն զանգահարել է Վաֆա անունով մի կին և ասել, որ նա իր թոռան փաստաբանն է, և որ Սամեդովը մեղադրվում է դավաճանության մեջ, քանի որ գտել են նրա նամակագրությունը հայերի հետ, որոնց հրահանգով էլ նա, իբր, գրել է Ադրբեջանի իշխանությունների քննադատությամբ հոդվածներ:
«Բահրուզը եղել և մնում է կարևոր ձայն խաղաղության մասին բանավեճերի և ԶԼՄ-ների մեկնաբանությունների մեջ, և ես հուսով եմ, որ նա որքան հնարավոր է շուտ ազատ կարձակվի», - գրել է Սամեդովին լավ ճանաչող ղարաբաղյան հակամարտության բրիտանացի հետազոտող Լոուրենս Բրոերսը սոցիալական ցանցերում: Ինքը՝ երիտասարդ գիտնականը, հայտնի է իր պացիֆիստական հայացքներով, ինչպես նաև որպես Հայաստանի հետ, որի հետ Ադրբեջանը պատերազմում է ավելի քան 30 տարի, շուտափույթ խաղաղության համաձայնագրի կողմնակից։
Իրավապաշտպանները նշում են, որ վերջին ամիսներին Ադրբեջանում տեղի են ունենում ամենամեծ ռեպրեսիաները Իլհամ Ալիևի իշխանության գալուց ի վեր։ Նրանց խոսքով, այժմ երկրում կա ավելի քան 300 քաղբանտարկյալ, ինչը երբեք չի եղել նրա կառավարման ամբողջ 20-ամյա ժամանակահատվածում։ Տասնյակ լրագրողներ են հայտնվել բանտերում այն բանից հետո, երբ նրանց սկսել են ձերբակալել անցյալ տարվա վերջից ֆինանսական հանցագործությունների մեղադրանքներով: Նրանց ձերբակալությունները մի քանի անգամ երկարաձգվել են, և, հետևաբար, վարչակարգի քննադատների շրջանում հույս կար, որ գուցե ինչ-որ կուլիսային բանակցություններ են ընթանում Արևմուտքի հետ, և նրանք կարող են ազատ արձակվել ՄԱԿ-ի Կլիմայի փոփոխության գագաթնաժողովի նախօրեին (COP29):
Սակայն այս ամիս շատ լրագրողների մեղադրանքները նույնիսկ խստացվել են, և նրանց սպառնում է մինչև 12 տարվա ազատազրկում։ Բանտերում են նաև քաղաքական ակտիվիստներ, իրավապաշտպաններ և գիտնականներ։
Ապրիլին Լոնդոնի տնտեսագիտության դպրոցի նշանավոր տնտեսագետ և գիտաշխատող Գուբադ Իբադօղլուն առողջական պատճառներով ազատ է արձակվել բանտից և տնային կալանքի տակ է։ Իսկ դրանից մեկ ամիս անց ձերբակալվել է մեկ այլ գիտնական՝ Ֆազիլ Գասիմովը, հունիսին ազգագրագետ Իգբալ Աբիլովը, ով ուսումնասիրում էր Ադրբեջանում էթնիկ փոքրամասնությունների իրավունքները։ Վերջինս ևս, ինչպես և Բահրուզը, մեղադրվում է դավաճանության մեջ։
Նյութը հրապարակման պատրաստեց Կամո Խաչիկյանը
