Առնվազն տուգանք․ Երևանում խաղալիք ավտոմեքենայով խոչընդոտել են երթևեկությանը
ՎԻԴԵՈՕրերս համացանցում տարածվեց տեսանյութ, որտեղ «Selfish» հագուստի խանութ-սրահների ցանցն իր հագուստները գովազդելու նպատակով մոդելներին հորդորել է կրել տվյալ խանութի հագուստները, նստել երեխաների համար նախատեսված խաղալիք մեքենան և երթևեկել քաղաքի կենտրոնական փողոցներում խոչընդոտելով տվյալ փողոցի երթևեկությունը։
Տեսանյութում երևում է, թե ինչպես են խանութի հագուստները գովազդող մոդելները մեքենայով հատում հոծ գծեր, վարում երթևեկությանը հակառակ ուղղությամբ և նման մի շարք կոպիտ խախտումներ անում, ինչն էլ շարժել է մի շարք վարորդների և հետնիոտների զայրույթը։
Oragir.News-ը կապ հաստատեց «Selfish» հագուստի խանութ-սրահ, զրուցեց աշխատակիցներից մեկի հետ, ով մեզ հետ զրույցում հերքեց այն փաստը, որ նրանք որևէ խախտում են արել․
«Փողոցներով չեն շրջել, մեր դիմացի փողոցից մի փոքրիկ հատված է եղել։ Ինչի՞ համար տուգանքներ ստանանք, ո՞ր խախտումների։ Դա ընդամենը խաղալիք մեքենա է։
Ոչ, տուգանք չենք ստացել։ Չեմ կարող ասել՝ այսպիսի գովազդներ կանենք, թե ոչ։ Դա մեր որոշելունն է։ Իսկ ինչ վերաբերում է տուգանքներին, չեմ կարծում, որ այնպիսի բան ենք արել, որ դրա համար տուգանք լինի»,- եզրափակեց խանութ-սրահի աշխատակիցը։
Oragir.News-ը կապ հաստատեց նաև ՀՀ նախկին փոխոստիկանապետ, գեներալ-մայոր Գագիկ Համբարձումյանի հետ, պարզելու՝ արդյո՞ք նման խախտումները օրենքով պատժելի են։
«Այլանդակության, անբարոյականության դրսևորում է դա։ Իհարկե՝ դա նաև վարչական պատասխանատվության հանգիստ կարելի է ենթարկել։ Բայց ինչու՞ եք զարմանում։ Էսօր ողջ երկիրը դրել, կործանում են, դրա վրա զարմանալու է՞»,- ասաց նա։
Համբարձումյանի խոսքով՝ երբ երկիրը բռնազավթած թշնամիները՝ հանձինս ՔՊ-ականների, ողջ երկրի գոյատևմանը հակառակ երթևեկում են, վտանգելով երկրի գոյությունը, ապա այդ խաղալիք մեքենայի տերերի երթևեկությունը զարմանալի չէ։
