Ադրբեջանը չի հավատում Փաշինյանի խաղաղասիրական գաղափարներին
ՎԵՐԼՈՒԾՈՒԹՅՈՒՆՆԵՐ
Հայ-ադրբեջանական սահմանին կրկին անհանգիստ է, Բաքուն մեղադրում է Երևանին հրադադարի խախտման մեջ, իսկ հայկական կողմը հերքում է իր մեղքը։ Այդ կապակցությամբ Հայաստանի վարչապետ Նիկոլ Փաշինյանը հանդես է եկել տարեսկզբից ի վեր երրորդ խաղաղապահ նախաձեռնությամբ, որն Ադրբեջանում անլուրջ են համարել, գրում է Ng.ru-ն։
«Երբ Փաշինյանը ասում է «սրացում», նա հավանաբար նկատի ունի, որ միտումնավոր լուրեր տարածելով հրադադարի խախտման մասին` ադրբեջանական բանակը ինչ-որ պլան է իրականացնում, - Ng.ru-ի հետ զրույցում ասել է «Ատլաս» քաղաքական հետազոտությունների կենտրոնի ղեկավար Էլխան Շահինօղլուն, – բայց Ադրբեջանը շահագրգռված չէ խախտումներով, նրան պետք է հանգստություն սահմանին։ Բաքուն հասել է իր հիմնական նպատակին, ապահովել է իր տարածքային ամբողջականությունն ու ինքնիշխանությունը Ղարաբաղի նկատմամբ»։ Միևնույն ժամանակ, փորձագետը նշել է, որ Փաշինյանն ինքը մի քանի անգամ խոսել է Հայաստանի զինված ուժերում «հինգերորդ շարասյան» գոյության մասին։ Որպես վառ օրինակ Շահինօղլուն բերել է փետրվարյան միջադեպը «Երկրապահ» կամավորական միության անդամի հետ, ով կրակ էր բացել ադրբեջանցի զինվորականների վրա և հետագայում ոչնչացվել:
«Պաշտոնական Բաքուն չի ընդունի միջադեպերի հետաքննության «համատեղ մեխանիզմ» ստեղծելու Փաշինյանի առաջարկը,- կարծում է փորձագետը,– նախ համատեղ հանձնաժողով ստեղծելու համար անհրաժեշտ է երկու երկրների միջև կնքել խաղաղություն կամ շրջանակային համաձայնագիր։ Երկրորդ հերթին, ինչպես խոստովանել է ինքը՝ Փաշինյանը, հայկական բանակում կան դիվերսիոն ուժեր։ Փոխհրաձգության փաստերը հաստատող «համատեղ հանձնաժողով» ստեղծելու փոխարեն Հայաստանի վարչապետը պետք է բանակը մաքրի խաղաղություն չցանկացող և վրեժխնդրության տենչացող տարբեր խմբերից»։
Քաղաքագետ Տիգրան Քոչարյանի կարծիքով էլ Ադրբեջանը Հայաստանին զիջումների գնալու անհրաժեշտություն չի տեսնում, քանի որ այժմ ամեն ինչ ընթանում է իր սցենարով։ «Փաշինյանը որդեգրել է «ամեն ինչ խաղաղության դիմաց» մարտավարությունը, բայց դա արդյունքի չի բերում,- կարծում է Քոչարյանը,- Ալիևը չի շտապում, քանի որ գիտի, որ եթե հիմա խաղաղության պայմանագիր ստորագրի, ապա ապագայում Հայաստանից նոր զիջումներ կորզելը, այդ թվում տարածքային, չի հաջողվի։ Փաստորեն, Ադրբեջանի իշխանությունների բախտը բերել է, որ ունի Հայաստանի նման ղեկավարը, և նրանք ցանկանում են առավելագույն օգուտ քաղել նրա իշխանությունից։ Միևնույն ժամանակ, ինչպես երևում է Ալիևի հետ Բլինկենի հեռախոսազրույցի օրինակից, նույնիսկ Ադրբեջանի վրա միջազգային ճնշումը չի բերում այն արդյունքին, որն անհրաժեշտ է Երևանին։ Բաքուն երկու դաշնակից ունի՝ նավթն ու գազը, որոնց շնորհիվ էլ միշտ առավելություն ունի»։
Նյութը հրապարակման պատրաստեց Կամո Խաչիկյանը
